বৃহস্পতিবাৰে মাজুলী জিলাৰ ফুলনিত মাজুলী মহকুমা ছাত্ৰ সন্থাই জৰাজীৰ্ণ পথৰ মেৰামতিৰ দাবীত পথ অৱৰোধ কাৰ্যসূচী ৰূপায়ণ কৰে।
প্ৰাপ্ত তথ্য মতে মাজুলী জিলাৰ মূল পথ গড়মূৰৰ পৰা ফুলনি হৈ জেংৰাই সংযোগী গড়কাপ্তানী পথৰ জৰাজীৰ্ণ অৱস্থাই ৰ্দীঘদিনৰ পৰা মাজুলীবাসিক জীয়াতু ভোগাই আহিছে।
যাৰ বাবে তৎক্ষানিক ভাৱে মেৰামতিৰ দাবী তুলি আজি উজনি মাজুলীৰ প্ৰধান ব্যৱসায়িক স্থান ফুলনিত মাজুলী মহকুমা ছাত্ৰ সন্থাই পুৱা ৮ বজাৰ পৰা তীব্ৰ প্ৰতিবাদেৰে পথ অৱৰোধ কাৰ্যসূচী ৰূপায়ণ কৰে ৷ এই অৱৰোধ কাৰ্যসূচীৰ ফলত দুপৰীয়া ১১ বজালৈকে মাজুলীৰ জন জীৱন ব্যাহত হৈ পৰে ৷
ইফালে অৱৰোধস্থলীত মাজুলী জিলা গড়কাপ্তানি বিভাগৰ বিষয়া আৰু অতিৰিক্ত উপায়ুক্ত উপস্থিত হৈ এসপ্তাহৰ ভিতৰত পথটো মেৰামতি কৰাৰ আশ্বাস প্ৰদান কৰাত সংগঠনটোৱে অৱৰোধ কাৰ্যসূচী স্থগিত ৰাখে।
লগতে সংগঠনটোৱে মাজুলীৰ জনসাধাৰণে ৰ্দীঘদিনৰ পৰা ভোগ কৰি অহা যাতায়াতৰ সমস্যা সমাধানৰ বাবে ব্যৱস্থা গ্ৰহণৰ দাবী জনাই মুখ্য মন্ত্ৰী সৰ্বানন্দ সোণোৱাললৈ এখন স্মাৰকপত্ৰ প্ৰেৰণ কৰে।