‘ নাৰী সকলক যিবোৰ ৰাষ্ট্ৰই সন্মান দিছে সেইবোৰ ৰাষ্ট্ৰ বিশ্বৰ বুকুত মহান ৰাষ্ট্ৰ হিচাপে পৰিগণিত হৈছে। এই আদৰ্শ সাৰোগত কৰিয়ে অসম চৰকাৰে বীৰাংগনা কনকলতা বৰুৱাৰ নামেৰে মহিলা সবলীকৰণৰ আঁচনি গ্ৰহণ কৰিছে’। এই মন্তব্য অসমৰ মুখ্য মন্ত্ৰী সৰ্বানন্দ সোণোৱালৰ।
আজি ধুবুৰী লোকসভা সমষ্টিৰ অন্তৰ্গত গোলকগঞ্জ বিধানসভা সমষ্টিৰ হালাকুৰা উচ্চতৰ মাধ্যমিক বিদ্যালয়ত অসম চৰকাৰৰ পঞ্চায়ত আৰু গ্ৰামোন্নয়ন বিভাগৰ সৌজন্যত তথা গ্ৰামীণ জীৱিকা অভিযানৰ অধীনত এক বিশাল মহিলা সমাৰোহ অনুষ্ঠিত হয়।
মুখ্য মন্ত্ৰী সৰ্বানন্দ সোণোৱালে এই অনুষ্ঠানতে লোকসভা সমষ্টিটোৰ অন্তৰ্গত ১০টা বিধানসভা সমষ্টিৰ মহিলা আত্মসহায়ক গোটসমূহলৈ কনকলতা মহিলা সবলীকৰণ আঁচনিৰ অধীনত প্ৰদান কৰা ২৫,০০০ টকাৰ চেক বিতৰণৰ কাৰ্যসূচীৰ শুভাৰম্ভ কৰে। এই আঁচনিৰ অধীনত ধুবুৰী লোকসভা সমষ্টিৰ ৬,৩৭২টা মহিলা আত্মসহায়ক গোটক ২৫ হাজাৰ টকাকৈ মুঠ ১০.৫৪ কোটি টকাৰ আৰ্থিক সাহায্য প্ৰদান কৰা হ’ব।
এই অনুষ্ঠানতে মুখ্য মন্ত্ৰী সোণোৱালে কয়, ‘ নাৰী সকল বহু মানৱীয় গুণৰ অধিকাৰী। মাতৃৰ শক্তি এগৰাকী পুৰুষতকৈ বহু পৰিমাণে বেছি আৰু এগৰাকী মাতৃৰ সন্তান হিচাপে আমি সকলোৱে সেই কথা উপলব্ধি কৰো। সেয়ে মহিলা আত্ম-সহায়ক গোটসমূহে প্ৰতিযোগিতামুখী মানসিকতাৰে আগবাঢ়ি নিজকে জাকত-জিলিকা কৰি তুলিব লাগিব’।
আজিৰ এই অনুষ্ঠানত গোলকগঞ্জ সমষ্টিৰ বিধায়ক অশ্বিনী ৰায় সৰকাৰ, মুখ্য মন্ত্ৰী সৰ্বানন্দ সোণোৱাল, খাদ্য আৰু অসামৰিক যোগান বিভাগৰ মন্ত্ৰী ফণীভূষণ চৌধুৰী, পঞ্চায়ত আৰু গ্ৰামোন্নয়ন বিভাগৰ মন্ত্ৰী নৱ কুমাৰ দলে, হাউছফেডৰ অধ্যক্ষ ৰঞ্জিত কুমাৰ দাস, পশ্চিম বিলাসীপাৰা বিধানসভা সমষ্টিৰ বিধায়ক হাফিজ বচিৰ আহমেদ আৰু গুৱাহাটী পৌৰসভাৰ উপ-পৌৰপতি বিজুলী কলিতা মেধীয়েও ভাষণ দিয়ে।
সমাৰোহত গৌৰীপুৰ সমষ্টিৰ বিধায়ক নিজানুৰ ৰহমান, পূব বিলাসীপাৰা সমষ্টিৰ বিধায়ক অশোক কুমাৰ সিংহী, ধুবুৰী জিলাৰ উপায়ুক্ত অনন্তলাল জ্ঞানীকে ধৰি বহু গণ্য-মান্য ব্যক্তি উপস্থিত থাকে।
