উত্তৰ-পূবৰ পৰা মানৱ সৰবৰাহ ৰোধ কৰাৰ বাবে চৰকাৰী আৰু বেচৰকাৰী স্তৰত বিভিন্ন প্ৰয়াস সত্ত্বেও ৰাজ্যত অব্যাহত আছে মানৱ সৰবৰাহ। বিশেষকৈ কিশোৰ-কিশোৰী সহজ বলি হৈ আহিছে এনেকুৱা দুষ্টচক্ৰৰ।
৫ জুনত জি আৰ পি আৰক্ষীৰ তৎপৰতাত ৰঙিয়া ষ্টেইশ্যনৰ ২ নং প্লেটফ’ৰ্মৰ পৰা এনেকুৱা দুষ্টচক্ৰৰ দ্বাৰা বহিঃৰাজ্যলৈ প্ৰেৰণ কৰিবলৈ লোৱা অৱস্থাত তিনিজন কিশোৰ আৰু দুগৰাকী যুৱতীক উদ্ধাৰ কৰাৰ লগতে এগৰাকী মহিলাকো এই সন্দৰ্ভত আটক কৰা হয়।
আৰক্ষীৰ জেৰাত গম পোৱা মতে, এই কিশোৰ-যুৱতীকেইজনৰ ঘৰ ধেমাজি জিলাৰ চিলাপথাৰত। তেওঁলোকক বসুমতাৰী উপাধিৰ মহিলাগৰাকীয়ে গুজৰাটৰ মাংগালোৰত থকা মাছ পেকেজিং কোম্পানিত চাকৰি দিয়াৰ প্ৰলোভন দি ঘৰৰ পৰা লৈ আহিছিল।
এই ধৰণৰ আন এটা সফলতাত ৰঙিয়া জি আৰ পিয়ে ষ্টেইশ্যনটোৰ ৪ নং প্লেটফৰ্মত থকা ফুটব্ৰীজৰ পৰা ছগৰাকী কিশোৰ-কিশোৰীক উদ্ধাৰ কৰিছে। ইয়াৰে চাৰিজন কিশোৰ আৰু দুগৰাকী কিশোৰী। এওঁলোকৰ ঘৰ ৰৌতা আৰু ঢেকীয়াজুলি। পৰিয়ালৰ অজ্ঞাতে এই কিশোৰ-কিশোৰকেইজন ৰে’লযোগে ৰঙিয়া ষ্টেইশ্যনত উপস্থিত হৈছিলহি। জি আৰ পিয়ে তেওঁলোকক কামৰূপ চাইল্ড লাইনৰ হাতত চমজাই দিয়ে।
এইখিনিতে উল্লেখ কৰিব পাৰি যে সোমবাৰে ৰঙিয়া আৰক্ষীয়ে মজিদ ৰহমান নামৰ এজন মানৱ সৰবৰাহকাৰীক আটক কৰিছিল।
