দুৰ্নীতিত নিমজ্জিত হৈ পৰা অসম লোকসেৱা আয়োগৰ সংস্কাৰ সাধন কৰাৰ বাবে পৰামৰ্শ আৰু নিৰ্দেশ দি অহাৰ পিছতো ৰাজ্য চৰকাৰে যাৱতীয় ব্যৱস্থা গ্ৰহণ নকৰাত শুকুৰবাৰে চৰকাৰলৈ নিৰ্দেশনা জাৰি কৰিছে গুৱাহাটী উচ্চ ন্যায়ালয়ে। গুৱাহাটী উচ্চ ন্যায়ালয়ৰ মুখ্য ন্যায়াধীশ অজিত সিঙে আয়োগৰ সংস্কাৰ সাধনৰ বাবে তৎকালে যাৱতীয় ব্যৱস্থা কাৰ্যকৰী কৰিবলৈ অসম চৰকাৰৰ কৰ্মচাৰী (খ) বিভাগৰ আয়ুক্ত সচিবলৈ এই নিৰ্দেশনা জাৰি কৰিছে।
উল্লেখযোগ্য যে অসম লোকসেৱা আয়োগৰ দুৰ্নীতি ফাদিল হোৱাৰ লগতে আয়োগৰ পূৰ্বৰ অধ্যক্ষকে ধৰি আয়োগৰ সদস্য আৰু বহুকেইজন ৰাজপত্ৰিত বিষয়াক আৰক্ষীয়ে গ্ৰেপ্তাৰ কৰাৰ পাছত আয়োগৰ সংস্কাৰ নকৰাক কেন্দ্ৰ কৰি সদৌ অসম নিবনুৱা সন্থাৰ সাধাৰণ সম্পাদক জীৱন ৰাজখোৱাই গুৱাহাটী উচ্চ ন্যায়ালয়ৰ দ্বাৰস্থ হৈছিল।ৰাজখোৱাই অসম আৰক্ষীৰ তদন্তত আয়োগৰ দুৰ্নীতি ফাদিল হৈ পৰাৰ কথা উল্লেখ কৰিছিল।
আনহাতে, অসম লোকসেৱা আয়োগৰ দুৰ্নীতি ফাদিল হৈ পৰাৰ পাছত ৫৫জন ৰাজপত্ৰিত বিষয়াসহ মুঠ ৬৩জন ব্যক্তিক গ্ৰেপ্তাৰ হৈছে। গ্ৰেপ্তাৰ হোৱাসকলৰ ভিতৰত আয়োগৰ পূৰ্বৰ নিলম্বিত অধ্যক্ষ ৰাকেশ পাল, সদস্য ছামেদুৰ ৰহমান, সদস্য বসন্ত কুমাৰ দলে, সহকাৰী পৰীক্ষা নিয়ন্ত্ৰক পৱিত্ৰ কৈৱৰ্তও আছে।
আয়োগৰ সংস্কাৰৰ বাবে নতুন বাছনি বিধি নিশ্চিত কৰাৰ পাছতো এই পৰ্যন্ত সেই নতুন সেৱা বিধি কিয় কাৰ্যকৰী কৰা নহ’ল বুলি আৱেদনকাৰীয়ে অনা অভিযোগৰ ভিত্তিত মুখ্য ন্যায়াধীশ অজিত সিঙক লৈ গঠিত বিচাৰপীঠে বিষয়টো অতি গুৰুত্ব সহকাৰে লৈ চৰকাৰক তাৎক্ষণিকভাৱে যাৱতীয় ব্যৱস্থা গ্ৰহণ কৰাৰ নিৰ্দেশ দিছে।
উল্লেখ্য যে নতুন খচৰা সেৱা বিধি অনুমোদনৰ বাবে দীৰ্ঘদিন ধৰি অসম চৰকাৰৰ কৰ্মচাৰী (খ) বিভাগত পৰি ৰৈছিল। চৰকাৰেও নতুন খচৰা বিধি সন্দৰ্ভত কোনো সিদ্ধান্ত লোৱা নাছিল। সেয়ে ৰাজহুৱা স্বাৰ্থজড়িত আৱেদনখনৰ ভিত্তিত ৰাজ্য চৰকাৰৰ কৰ্মচাৰী (খ) বিভাগক তৎকালে যাৱতীয় ব্যৱস্থা ল’বলৈ উচ্চ ন্যায়ালয়ে নিৰ্দেশ দিয়ে।
