শুনানিৰ সময়ত মুখ্য সচিবৰ অনুপস্থিতি : মেঘালয় চৰকাৰক চমন সৰ্বোচ্চ ন্যয়ালয়ৰ

পৰিৱেশ সম্পৰ্কীয় পুঁজিৰ সঠিক উপযোগ নকৰি অন্য কামত ব্যৱহাৰ কৰাৰ সন্দৰ্ভত ভাৰতৰ সৰ্বোচ্চ ন্যায়ালয়ে প্ৰদান কৰা শুনানিৰ সময়ত মেঘালয়ৰ মুখ্য সচিব উপস্থিত নথকাৰ বাবে মেঘালয় চৰকাৰলৈ চমন জাৰী কৰিছে সৰ্বোচ্চ ন্যায়ালয়ে।

সৰ্বোচ্চ ন্যায়ালয়ে উল্লেখ কৰিছে যে মেঘালয়কে আদি কৰি বহুকেইখন ৰাজ্যৰ চৰকাৰে পৰিৱেশ সংৰক্ষণৰ দ্বাৰা জনসাধাৰণৰ কল্যাণ সাধন কৰাৰ বাবে যি পুংজিৰ আবণ্টন দিয়া হৈছিল সেই ধনৰাশি অন্য কাম যেনে পৌৰসভাৰ কামত ব্যয় কৰিছে।

সৰ্বোচ্চ ন্যায়ালয়ে মেঘালয়ৰ মুখ্য সচিবক সোমবাৰে আদালতত হাজিৰ হৈ শুনানিত উপস্থিত থাকিবৰ বাবে বাবে কঠোৰ নিৰ্দেশ জাৰী কৰিছে।

মদন বি লকুৰ আৰু দীপক গুপ্তাৰে গঠিত এখন খণ্ড বিচাৰপীঠে কৈছে যে ক্ষতিপূৰক বৃক্ষৰোপণ পুঁজি ব্যৱস্থাপনা আৰু পৰিকল্পনা প্ৰাধিকৰণৰ (Compensatory Afforestation Funds Management and Planning Authority) ৫০,০০০ কোটি সহ প্ৰায় ৭৫,০০০ টকা ৰাজ্য চৰকাৰসমূহৰ ওচৰত অব্যৱহৃত অৱস্থাত পৰি আছে।

ইয়াৰ পূৰ্বে মেঘালয়ে পূৰণ কৰা এক শপতনামাৰ ওপৰত ভিত্তি কৰি সৰ্বোচ্চ ন্যায়ালয়ে ৰাজ্যৰ মুখ্য সচিবগৰাকীক আদালতত হাজিৰ হোৱাৰ বাবে নিৰ্দেশ প্ৰদান কৰিছিল। এই শপতনামাত উল্লেখ কৰা আছে যে জনসাদাৰণৰ কল্যাণৰ বাবে আবণ্টিত ধন বেংকত জমা হৈ আছে।

শ্বিলং টাইমত এই সন্দৰ্ভত প্ৰকাশিত প্ৰতিৱেদনটোত কোৱা হৈছে যে এই ধ:ৰাশি কেনেদৰে ব্যৱহাৰ কৰা হৈছে সেই সন্দৰ্ভত কেন্দ্ৰ পৰা উত্তৰ বিচাৰিছিল সৰ্বোচ্চ ন্যায়ালয়ে।

ইয়াৰ পূৰ্বেও পুঁজি ব্যৱহাৰ নকৰাৰ বাবে মেঘালয়লৈ চমন জাৰী কৰিছিল সৰ্বোচ্চ ন্যায়ালয়ে।

প্ৰতিৱেদনটোত আৰু কোৱা হৈছে যে শুনানিৰ সময়ত পৰিৱেশ, বন আৰু জলবায়ু পৰিৱৰ্তন মন্ত্ৰ্যালয়ৰ হৈ সৰ্বোচ্চ ন্যায়ালয়ত উপস্থিত থকা অতিৰিক্ত মহাধিবক্তা এ এন এছ নাদকাৰ্ণিয়ে বিচাৰপীঠখনৰ ওচৰত বক্তব্য ৰাখিছিল যে পুজিখিনি নিৰাপদে আছে আৰু প্ৰশ্নটো হৈছে ইয়াক কেনেদৰে ব্যৱহাৰ কৰা হ’ব।

উল্লেখ্য যে পৰিৱেশবিদ এম চি মেহতাই দিল্লীৰ ৰাষ্ট্ৰীয় ৰাজধানী এলেকাত হোৱা বায়ু প্ৰদূষণৰ বিষয়ত প্ৰেৰণ কৰা এখন জনস্বাৰ্থ জড়িত আবেদনৰ ভিত্তিত সৰ্বোচ্চ ন্যায়ালয়ে শুনানি জাৰী কৰিছিল।