দুবেলা দুসাজৰ বাবে চিন্তা কৰিব লগা হৈছিল গাঁওবাসীয়ে। বানে জুৰুলা কৰা, ব্ৰহ্মপুত্ৰৰ খহনীয়াই খেদি ফুৰা গাঁওবাসীৰ বাবে জীয়াই থকাটোৱেই একপ্ৰকাৰ ডাঙৰ প্ৰত্যাহ্বান হৈ পৰিছিল। বান-খহনীয়াৰ দুৰ্যোগৰ মাজতে খৰালিৰ সময়ছোৱাত সৰিয়হৰ খেতি কৰি দুপইচা উপাৰ্জন কৰিছিল গাঁওবাসীয়ে। তাৰেই পৰিয়াল পোহ পাল দি কোনোমতে জীৱনটো পাৰ কৰিছিল দৰিদ্ৰ গাঁওবাসীয়ে।
এনেতে গাঁওবাসীৰ জীৱনলৈ আশাৰ সপোন কঢ়িয়াই আনিলে অনিতা দলে পেগু নামৰ এগৰাকী মহিলাই । কঠোৰ শ্ৰম কৰিব পৰা গাঁও খনৰ মহিলা সকলৰ শ্ৰমশক্তিকে সাৰথি কৰি লৈ গাঁওখনত আৰম্ভ কৰিলে এক নতুন বিপ্লৱ। মহিলা সকলক লৈ প্ৰথমে অনিতা দলে পেগুৱে মুগা পালনৰ প্ৰশিক্ষণ দিয়াৰ ব্যৱস্থা কৰিলে।
পূৰ্বতে গাঁৱৰ কোনো কোনো লোকে মুগা পালন কৰিছিল যদিও সেয়া আছিল তেনেই সীমিত পৰিসৰৰ। প্ৰতিটো পৰিয়ালৰ ঘৰৰ পিছফালে বিশাল কৃষি পথাৰ সমুহত ৰোপন কৰা হ’ল চোম গছ। অধিক মুগা পালন কৰা, মুগা সুতাৰ পৰা ঘৰৰ তাঁতশালতে ন ন বস্ত্ৰ তৈয়াৰ কৰি তাক বজাৰমুখী কৰা আদি কামত নিয়োজিত হৈ পৰিল মহিলা শক্তি।
এই খনেই হৈছে মাজুলীৰ একমাত্ৰ আহোম গাঁও ‘চাওৰেকিয়া’। সোণালী সুতাৰ গাঁও হিচাপে এতিয়া পৰিচিত হৈ পৰিছে মাজুলীৰ এই চাওৰেকিয়া গাঁও। ৯৫ টা পৰিয়ালেৰে মাজুলীৰ একমাত্ৰ আহোম গাঁৱখনৰ প্ৰতিটো পৰিয়ালে ঘৰৰ পিছফালে গঢ়ি তুলিছে বিশাল চোমনি ।
মুগা পালন, তাঁত শালত ন ন বস্ত্ৰ তৈয়াৰ কৰাৰ লগতে অসমৰ বিভিন্ন বজাৰত উৎপাদিত বস্ত্ৰ মুকলি কৰি মহিলা সকলে গাঁওখনৰ অৰ্থনৈতিক মানচিত্ৰই সলনি কৰি দিবলৈ সক্ষম হৈছে।
বৰ্তমান গাঁওখনৰ প্ৰতি গৰাকী মহিলা মুগা পালকে মাহে দহ হাজাৰৰ পৰা এক লাখ চল্লিশ হাজাৰলৈকে উপাৰ্জন কৰিবলৈ সক্ষম হৈছে। মাজুলীৰ সোণালী সূতাৰ গাঁও চাওৰেকীয়াৰ চোমনিত এতিয়া সোণৰ দৰে অমূল্য ৰতন হৈ উজ্বলি উঠিছে প্ৰতিগৰাকী মহিলাৰ কৰ্মময় জীৱন। অনিতা দলে, অনুপমা গগৈৰ দৰে মহিলা সকলে গাঁওখনত বৈপ্লৱিক পাৰিবৰ্তন সাধিবলৈ সক্ষম হৈছে ।
চৰকাৰৰ আঁচনিয়ে ঢুকি পালে, চৰকাৰ তথা মাজুলী জিলা প্ৰশাসনে কিছু সহায়ৰ হাত আগবঢ়ালে এইসকল মহিলাই মাজুলীৰ অৰ্থনৈতিক কাঠামোটোকে সলনি কৰি দিব পাৰে।
