হোজাইৰ এছ অ’ শিশু গাঁও চৌহদত দুদিন ধৰি অনুষ্ঠিত হোৱা তৰংগ প্ৰতিযোগিতা শনিবাৰে সমাপ্ত হৈছে। এই উৎসৱৰ সৈতে সংগতি ৰাখি হোজাইৰ এছ অ’ এছ শিশু গাঁও চৌহদত বিভিন্ন সাংস্কৃতিক আৰু ক্ৰীড়া-ভিত্তিক কাৰ্যসূচীৰ আয়োজন কৰা হৈছে।
গ্ৰাম সঞ্চালক পৰেশ বৈদ্যকাৰে জনাইছে যে এছ অ’ এছ গাঁওসমূহৰ শিশুসকলৰ অন্তৰ্নিহিত প্ৰতিভাৰ উমান ল’বলৈ এই তৰংগ উৎসৱ অনুষ্ঠিত কৰা হৈ আহিছে। যোৱা ২৯ মে’ত হোজাইত অৱস্থিত এছ অ’ এছ শিশু গাঁওখনত গাঁও পৰ্যায়ৰ তৰংগ প্ৰতিযোগিতা ‘গ্ৰাম তৰংগ-২০১৮’ (ক্ৰীড়া আৰু সংস্কৃতি) অনুষ্ঠিত হৈ যায়।
সঞ্চালকগৰাকীয়ে আৰু জনাইছে যে তৰংগ কাৰ্যসূচীৰ অন্তৰ্গত গাঁও পৰ্যায়ৰ প্ৰতিযোগিতাত বিজয়ী হোৱা প্ৰতিযোগীসকলক মাণ্ডলিক পৰ্যায়ৰ তৰংগ ক্ৰীড়া আৰু সাংস্কৃতিক প্ৰতিযোগিতাত অংশগ্ৰহণ কৰাৰ বাবে নিৰ্বাচিত কৰা হ’ব। ‘মাণ্ডলিক তৰংগ-২০১৮’ৰ ক্ৰীড়া শাখাৰ প্ৰতিযোগিতা ৰুৰকেলাত আৰু সাংস্কৃতিক শাখাৰ প্ৰতিযোগিতা বেগুনচৰাই এছ অ’ এছ শিশু গাঁওত অনুষ্ঠিত হ’ব।
মাণ্ডলিক পৰ্যায়ৰ তৰংগ প্ৰতিযোগিতাৰ বিজয়ীসকলক ২০১৮ চনৰ নৱেম্বৰ মাহত দিল্লীত অনুষ্ঠিত হ’বলগীয়া ৰাষ্ট্ৰীয় পৰ্যায়ৰ ক্ৰীড়া আৰু সাংস্কৃতিক প্ৰতিযোগিতাত অংশগ্ৰহণ কৰাৰ বাবে নিৰ্বাচিত কৰা হ’ব বুলি বৈদ্যকৰে জানিবলৈ দিছে।
এই বছৰ মাণ্ডলিক পৰ্যায়ৰ তৰংগ প্ৰতিযোগিতাৰ ক্ৰীড়া শাখাৰ বাবে ৪৫ গৰাকী শিশুৰ মাজৰ পৰা ১২ গৰাকী আৰু সাংস্কৃতিক শাখাত ৬২ গৰাকীৰ মাজৰ পৰা ১৭ গৰাকীক নিৰ্বাচিত কৰা হৈছে।
