অহা বৃহস্পতিবাৰৰ পৰা ডিমা হাচাও জিলাত অনিৰ্দিষ্ট কালৰ কাৰণে ৰে’ল অৱৰোধ কাৰ্যসূচী গঢ়ি তুলিব ইণ্ডিজেনাছ ষ্টুডেণ্ট ফ’ৰাম চমুকৈ আইএছএফে। এন এফ ৰে’লৱেৰ ব্ৰডগজ ৰেলপথ নিৰ্মাণত ক্ষতিগ্ৰস্ত হোৱা পাহাৰীয়া ৰাইজৰ বাকী থকা ক্ষতিপূৰণ মোকলাই দিয়াৰ ক্ষেত্ৰত বিভাগটোৱে অনিহা প্ৰদৰ্শন কৰাত ক্ষুন্ন হৈয়ে আইএছএফে উক্ত প্ৰতিবাদ সাব্যস্ত কৰাৰ সিদ্ধান্ত গ্ৰহণ কৰিছে।
প্ৰকৃততে ৰে’ল বিভাগৰ ফালৰ পৰা ক্ষতিপূৰণৰ এটা অংশ মোকলাই দিয়া হৈছে যদিও বাকি থকা ক্ষতিপূৰণ মোকলাই দিয়াৰ কাৰনে এখনৰ পাছত এখন যুটীয়া বৈঠক অনুষ্ঠিত হোৱাৰ পাছতো এতিয়ালৈ ৰাইজে তেওঁলোকৰ প্ৰাপ্য ধন পোৱা নাই।
এই সম্পৰ্কত আইএছএফৰ সভাপতি ডেভিদ কেইভমে কয় যে একেখন ক্ষতিপূৰণ ইছ্যু লৈ হাফলং, লামডিং আৰু গুৱাহাটীৰ মালিগাঁৱত ৰে’লৱেৰ মুখ্য কাৰ্যালয়ত পোন্ধৰখন মান যুটীয়া বৈঠক অনুষ্ঠিত হৈছে। য’ত উত্তৰ কাছাৰ পাৰ্বত্য স্বায়ত্ত শাসিত পৰিষদৰ ভূমি আৰু ৰাজহ বিভাগৰ বিষয়াৰ বাহিৰে ডিমা হাচাও জিলা প্ৰশাসনৰ বিষয়ববীয়া সকলো উপস্থিত আছিল।
কিন্তু পৰিতাপৰ কথাটো হ’ল যে ৰে’ল কৰ্তৃপক্ষই সময়ে সময়ে প্ৰতিশ্ৰুতি দিলেও বাস্তবত ভূমি হেৰুৱা ৰাইজে আজি লৈকে নিজৰ প্ৰাপ্য ধন আদায়ত সক্ষম হোৱা নাই। যোৱা তিনি চাৰি মাহে ৰে’ল বিভাগৰ ফালৰ পৰা মাথো এটাৰ পাছত এটা দিন তাৰিখ দি থাকিলেও প্ৰকৃততে ক্ষতিগ্ৰস্ত লোকসকল প্ৰাপ্যৰ পৰা সম্পূৰ্ণ বঞ্চিত হৈ আহিছে।
ডেভিদৰ মতে ৰে’ল বিভাগে পাহাৰীয়া ৰাইজৰ আগত মিথ্যাচাৰৰ আশ্ৰয় লৈছে। বাৰম্বাৰ অনুৰোধ কৰাৰ পাছতো ৰে’লৱে নিজৰ স্থিতিত অটল। সেয়ে ৰে’লৱেৰ এনে স্বৈৰাচাৰী মনোভাবৰ প্ৰতিবাদত ১৯ এপ্ৰিলৰ পৰা জিলাখনত অনিৰ্দিষ্টকালীন ৰে’ল অৱৰোধ গঢ়ি তোলা হ’ব।
আইএছএফে জানিবলৈ দিয়া মতে ৰে’ল বিভাগে পূৰ্বতে ১.৭৮ কোটি টকা ক্ষতিপূৰণ হিচাপে মোকলাই দিছিল। আৰু এতিয়া ক্ষতিপূৰণ হিচাপে বাকি থকা ধনৰ পৰিমান হৈছে ৪.৫৮ কোটি টকা।
উল্লেখনীয় যে যোৱা ১ মাৰ্চত অসম আৰক্ষীৰ বিশেষ শাখাৰ ডিজিপি পল্লব ভট্টাচাৰ্য্যৰ উপস্থিতিত হাফলঙত ক্ষতিপূৰণ সংক্ৰান্ত বিষয়লৈ হাফলং জিলা উপায়ুক্ত কাৰ্যালয়ৰ কনফাৰেন্স হলত ৰে’ল বিভাগৰ বহুতো বিষয়াৰ উপস্থিতিত এক গুৰুত্বপূৰ্ণ বৈঠক অনুষ্ঠিত হৈছিল। উক্ত বৈঠকত ক্ষতিপূৰণ আদায় দিয়াৰ বাবে ৰে’ল বিভাগৰ ফালৰ পৰা এমাহ সময় বিচৰা হৈছিল। কিন্তু এমাহ সময় অতিক্ৰম কৰাৰ পাছতো বৰ্তমান পৰ্যন্ত ক্ষতিপূৰণ আদায়ৰ কাম আগ বঢ়া নাই। আৰু ইয়াৰ ফলশ্ৰুতিতে সংগঠনটোৱে ১৯ এপ্ৰিলৰ পৰা ৰে’ল অৱৰোধ কাৰ্যসূচী গ্ৰহণ কৰিব।
