কংগ্ৰেছৰ জ্যেষ্ঠ নেতা অনিল ৰাজাই অসমৰ প্ৰাক্তন মন্ত্ৰী ৰকিবুল হুছেইনৰ পৰ্বতসম সম্পত্তিৰ তালিকাৰ বিষয়ে ৰাজহুৱা কৰাৰ লগে লগে সৰ্বত্ৰে ব্যাপক চৰ্চিত হোৱা পৰিলক্ষিত হৈছে। এই সমগ্ৰ বিষয়টোত কৃষক নেতা অখিল গগৈ কিয় নিমাত হৈ আছে তাকে লৈ প্ৰশ্ন উত্থাপন কৰিছে অসম ৰাজ্যিক ভাৰতীয় জনতা পাৰ্টীৰ নেতৃবৃন্দই।
বৃহস্পতিবাৰে অসম প্ৰদেশ বিজেপিৰ মুখপাত্ৰ ৰুপম গোস্বামীয়ে এই সন্দৰ্ভত আয়োজন কৰা এখন সংবাদ মেলত কয়, ‘কৃষক নেতা অখিল গগৈ অসমৰ সকলো ধৰণৰ দুৰ্নীতি সম্পৰ্কীয় বিষয়ত মাত মাতি অহা পৰিলক্ষিত হয়। কিন্তু কংগ্ৰেছ দলৰ নেতা তথা প্ৰাক্তন মন্ত্ৰী ৰকিবুল হুছেইনৰ বিৰুদ্ধে দুৰ্নীতিৰে সম্পত্তিৰ পাহাৰ গঢ়া বিষয়টো নিজ দলৰে নেতাই ৰাজহুৱা কৰাৰ পিছতো অখিল গগৈয়ে একো মাত মতা নাই। নেতাজনে বিষয়টোত একো মন্তব্য নকৰাটোৱে সমাজৰ বিভিন্ন শ্ৰেণীৰ মাজত প্ৰশ্নৰ উদ্বেগ ঘটিছে’।
অসমত বিজেপি নেতৃত্বাধীন চৰকাৰখনে দুৰ্নীতিৰ বিৰুদ্ধে উল্লেখনীয় পদক্ষেপ গ্ৰহণ কৰা বুলিও উক্ত সংবাদ মেলখনতে বিজেপি নেতাজনে কয়। তেওঁ আৰু কয়, ‘সৰ্বানন্দ সোণোৱাল নেতৃত্বাধীন চৰকাৰখনে বৰ্তমানলৈ দুৰ্নীতিত অভিযুক্ত ১৪৩ গৰাকী চৰকাৰী বিষয়া, ১১ জন ঠিকাদাৰৰ লগতে ৩০ গৰাকীকৈ পঞ্চায়তৰ সদস্যক গ্ৰেপ্তাৰ কৰিছে’।
ৰাজ্যিক বিজেপিৰ মুখপাত্ৰ গোস্বামীয়ে লগতে আৰু কয়, ‘ অসম লোক সেৱা আয়োগৰ প্ৰাক্তন অধ্যক্ষ ৰাকেশ পালৰ লগতে আন ৩৫ গৰাকী বিষয়াকো গ্ৰেপ্তাৰ কৰা হৈছে। ৭০০ কোটিটকীয়া কৃষি কেলেংকাৰীৰ লগত জৰিত থকাৰ অভিযোগত এজন উপায়ুক্তৰ লগতে আন আন বিষয়াসকলোকো গ্ৰেপ্তাৰ কৰিছে’।
চেণ্টাৰ ফ’ৰ মিডিয়া ষ্টাডিজে চলোৱা এক সমীক্ষাত প্ৰকাশ পাইছে যে পূৰ্বৰ তুলনাত বৰ্তমান অসমত দুৰ্নীতি কমিছে। ইয়াৰ পূৰ্বে অসমত দুৰ্নীতি আছিল ৩৪ শতাংশ আৰু বৰ্তমান হ’ল ১৮ শতাংশ। তদুপৰি ৰাজ্যখনৰ ৰাজহ সংগ্ৰহো ২১.৬ শতাংশলৈ বৃদ্ধি পোৱা বুলি মুখপাত্ৰ গোশ্বামীয়ে জানিবলৈ দিয়ে।
দুৰ্নীতি নিবাৰক আৰু তদাৰকী অনুসন্ধানকাৰী দলে দুৰ্নীতিত লিপ্ত হোৱা বহু বিষয়াক গ্ৰেপ্তাৰ কৰাৰ লগতে তেওঁলোকৰ পৰা নগদ ধন তথা বহু টকা মূল্যৰ সোণ আদি জব্দ কৰিবলৈ সক্ষম হোৱা বুলিও বিজেপি নেতাজনে কালিৰ সংবাদ মেলত প্ৰকাশ কৰে।
