অসমৰ থলুৱা কলা-কৃষ্টি-সংস্কৃতিৰ চৰ্চা, সংৰক্ষণ আৰু অধ্যয়নৰ উদ্দেশ্য আগত ৰাখি গুৱাহাটীত স্থাপন কৰা হৈছিল শ্ৰীমন্ত শংকৰদেৱ কলাক্ষেত্ৰ। অসম চুক্তিৰ আধাৰত স্থাপন কৰা এই বৃহৎ সাংস্কৃতিক অনুষ্ঠানটো বিগত কিছুদিনৰ পৰা বিভিন্ন ৰাজনৈতিক দলৰ সভা-সমিতি অনুষ্ঠিত কৰা থলীলৈহে যেন পৰ্যৱসিত হৈছে।
উল্লেখ্য যে, ২০ মে’ত অসমলৈ আহিব বিজেপিৰ ৰাষ্ট্ৰীয় অধ্যক্ষ অমিত শ্বাহ। অমিত শ্বাহৰ উপস্থিতিত নৰ্থ-ইষ্ট ডেমক্ৰেটিক এলেয়েন্স, চমুকৈ ‘নেডা’ৰ তৃতীয়খন বৈঠক শ্ৰীমন্ত শংকৰদেৱ কলাক্ষেত্ৰৰ আন্তৰ্জাতিক প্ৰেক্ষাগৃহত অনুষ্ঠিত হ’ব। ইয়াৰ পূৰ্বেও শাসক দল বিজেপিৰ কেইবাখনো গুৰত্বপূৰ্ণ সভা শংকৰদেৱ কলাক্ষেত্ৰৰ প্ৰেক্ষাগৃহত অনুষ্ঠিত হৈ গৈছে। কেৱল বিজেপিয়েই নহয় চৰকাৰৰ মিত্ৰদল অসম গণ পৰিষদকে ধৰি আন কেইবাটাও দলৰ সভা অনুষ্ঠিত হৈছে কলাক্ষেত্ৰৰ প্ৰেক্ষাগৃহত। কিন্তু কলা-সংস্কৃতি চৰ্চাৰ বাবে স্থাপিত এই অনুষ্ঠানৰ চৌহদত ৰাজনৈতিক কাৰ্যসূচীৰ নিয়মীয়া ক্ষেত্ৰত পৰিণত কৰাটো কিমান দূৰ গ্ৰহণযোগ্য?
শ্ৰীমন্ত শংকৰদেৱ কলাক্ষেত্ৰত ৰাজনৈতিক সভা-সমিতি অনুষ্ঠিত কৰা বিষয়টো সন্দৰ্ভত বিভিন্নজন ব্যক্তিৰে হোৱা নৰ্থ-ইষ্ট নাওৰ বাৰ্তালাপত মিশ্ৰিত প্ৰতিক্ৰিয়া লাভ কৰা হৈছে।
এই সন্দৰ্ভত সদৌ অসম ছাত্ৰ সন্থাৰ উপদেষ্টা ড০ সমুজ্জ্বল কুমাৰ ভট্টাচাৰ্যই প্ৰতিক্ৰিয়া ব্যক্ত কৰি কয়, “শ্ৰীমন্ত শংকৰদেৱ কলাক্ষেত্ৰ যি উদ্দেশ্য আগত ৰাখি স্থাপন কৰা হৈছিল সেই অনুসৰি তাত ৰাজনৈতিক কাৰ্যসূচী অনুষ্ঠিত হোৱাটো গ্ৰহণযোগ্য নহয়। ৰাজনৈতিক কুচ-কাৱাজৰ বাবে বেলেগ বেলেগ ঠাই আছে, তাত ৰাজনৈতিক সভা-সমিতি অনুষ্ঠিত কৰক। কিন্তু কৃষ্টি-সংস্কৃতিৰ বাবে স্থাপন কৰা এক বিশেষ স্থানত এনে কাৰ্যসূচী পতাটো কেতিয়াও উচিত নহয়। সেইটো ক’বলগীয়া কথা নহয়, কলাক্ষেত্ৰ সমাজে নিজেই বুজি পাব লাগে।”
একেদৰেই শংকৰদেৱ কলাক্ষেত্ৰত ৰাজনৈতিক কাৰ্যসূচী অনুষ্ঠিত কৰা কথাটোৰ তীব্ৰ বিৰোধিতা কৰি জ্যেষ্ঠ সাংবাদিক মনজিৎ মহন্তই কয়, “অসম চুক্তিৰ আধাৰত অসমৰ কৃষ্টি-সংস্কৃতিৰ অধ্যয়ন, সংৰক্ষণ, প্ৰসাৰ আৰু চৰ্চাৰ উদ্দেশ্যে স্থাপন কৰা গুৰুজনাৰ নামাংকৃত এটা অনুষ্ঠানক ৰাজনৈতিক কাৰ্যত ব্যৱহাৰ কৰাটো দুৰ্ভাগ্যজনক।” তেওঁ লগতে আগতেও এনেকুৱা অনুষ্ঠান কলাক্ষেত্ৰত অনুষ্ঠিত হৈছিল যদিও বৰ্তমানৰ বিজেপি চৰকাৰ দিনত ৰাজনৈতিক মেল-মিটিং বেছিকৈ অনুষ্ঠিত হৈছে বুলি মন্তব্য কৰে।
আনহাতে, এই বিষয়ত বিশিষ্ট সাহিত্যিক অনুৰাধা শৰ্মা পূজাৰীয়ে কয়, “শংকৰদেৱ কলাক্ষেত্ৰত নাট, ভাওনা, বিভিন্ন সাংস্কৃতিক কাৰ্যসূচী, ৰাষ্ট্ৰীয় পৰ্যায়ৰ আলোচনা চক্ৰ অনুষ্ঠিত হৈয়ে থাকে। কিন্তু অন্য অনুষ্ঠান নথকা সময়ত প্ৰেক্ষগৃহকেইটা এনেই পেলাই থোৱাতকৈ কিবা অনুষ্ঠানৰ কাৰণে ভাৰালৈ দিলে অলপ ৰাজহ আদায় হয়, যিটো কলাক্ষেত্ৰৰ কামতেই ব্যৱহাৰ কৰিব পাৰে।”
একেদৰে অসম জাতীয়তাবাদী যুৱ-ছাত্ৰ পৰিষদৰ সভাপতি পলাশ চাংমায়েও কলা-সংস্কৃতিক আগস্থান দি ৰাজহ আদায়ৰ কাৰণে কিবা অনুষ্ঠিত কৰাত একো অসুবিধা নেদেখা বুলি মত ব্যক্ত কৰে।
