ডিব্ৰুগড় জিলাৰ লাহোৱালত কালি মাজনিশা সেনাৰ ডাও ডিভিজনে এক অভিযান চলাই দুজনকৈ আলফা (স্বা)ৰ সদস্য আটক কৰিবলৈ সক্ষম হয়।
প্ৰাপ্ত তথ্য মতে, এক নিৰ্ভৰযোগ্য সূত্ৰৰ পৰা মৰান তিনিচুকীয়া ঘাইপথত আলফা (স্বা)ৰ সদস্যৰ চলাচলৰ সম্ভেদ লাভ কৰি কালি শুকুৰবাৰে মাজৰাতি ৰাজপুতানা ৰাইফলছৰ ৯ নং বেটেলিয়নে অঞ্চলটোত এক অভিযান চলায়।
উক্ত অভিযানত তেওঁলোকে এ এছ-০৪পি-৭১৩৯ নম্বৰৰ এখন অ’মনি ভানত মৰানৰ পৰা তিনিচুকীয়া দিশে গৈ থকা অৱস্থাত জ্ঞানদ্বীপ বৰগোহাঁই আৰু মৃদুল শৰ্মা নামৰ দুজন আলফা সদস্যক আটক কৰে। আটকাধীন সদস্য দুজনৰ কবলৰ পৰা এটা .২২ এম এম পিষ্টল, এটা মেগাজিন, ৩ জাঁই সক্ৰিয় গুলী উদ্ধাৰ কৰা হয়।
সেনা বাহিনীয়ে জনোৱা মতে তেওঁলোকে বিদ্ৰোহী সংগঠনটোৰ একাধিক ধন দাবী তথা ‘ৰাষ্ট্ৰ বিৰোধী’ কাম-কাজৰ সৈতে জড়িত আছিল।
উল্লেখযোগ্য যে সম্প্ৰতি ৰাজপুতানা ৰাইফলছৰ ৯ নং বেটেলিয়নে উজনি অসমত আলফা (স্বা)ৰ বিৰুদ্ধে অভিযান তীব্ৰ কৰি তুলিছে। ইয়াৰে অংশ হিচাপে কালিৰ এই অভিযান বিদ্ৰোহী গোটটোৰ বিৰুদ্ধে এক বিশেষ সাফল্য হিচাপে গণ্য কৰা হৈছে।
