উত্তৰ-পূবৰ প্ৰকৃতি প্ৰেমীসকলৰ বাবে সুখবৰ। অৰুণাচল প্ৰদেশৰ দয়িং এৰিং বন্যপ্ৰাণী অভয়াৰণ্যত বনৰীয়া জীৱ-জন্তুৰ এক উল্লেখযোগ্য সংখ্যা বৃদ্ধি হোৱা পৰিলক্ষিত হৈছে।
এক কটকটীয়া নিৰাপত্তা ব্যৱস্থা গঢ়ি তোলাৰ বাবেই ১৯০ বৰ্গ কি.মি এলেকা আৱৰি থকা অভয়াৰণ্যখনত বনপ্ৰাণীৰ উক্ত সংখ্যা বৃদ্ধি হৈছে বুলি অভৰাণ্যখনৰ ঘনিষ্ঠ সূত্ৰৰ পৰা জানিব পৰা গৈছে।
প্ৰকৃতিপ্ৰেমী সংগঠন আৰণ্যকে চলোৱা এক সমিক্ষাত অভয়াৰণ্যখনত বিভিন্ন প্ৰজাতিৰ হৰিণ, বাঘ, বনৰীয়া গাহৰি, বনৰীয়া মহ, বনৰীয়া হাতীকে ধৰি কেইবাবিধ জন্তুৰ উপস্থিতিৰ কথা জানিব পৰা যায়।
ইয়াৰ উপৰি অভয়াৰণ্যখন কেইবাপ্ৰজাতিৰ পক্ষীৰো আৱাসস্থলী। ইয়াৰ ভিতৰত দুষ্প্ৰাপ্য প্ৰজাতিৰ শগুন আৰু বেংগল ফ্লৰিকান অন্যতম।
অৰুণাচলৰ পূব ছিয়াং জিলাৰ পাচিঘাট নগৰৰ পৰা ১৬ কি.মি দূৰত্বত অৱস্থিত উক্ত অভয়াৰণ্যখনে অঞ্চলটোত পৰিৱেশৰ সন্তোলন বজাই ৰখাত এক গুৰুত্বপূৰ্ণ ভূমিকা লৈ আহিছে। ইয়াৰোপৰি অসমৰ পবা সংৰক্ষিত বনাঞ্চলৰ জীৱ-জন্তুকো ই আশ্ৰয় দি আহিছে।
দয়িং এৰিং বন্যপ্ৰাণী অভয়াৰণ্যত যোৱা ৫ বছৰত চোৰাং চিকাৰৰ কাৰ্যকলাপ যথেষ্ট পৰিমানে ৰোধ কৰা হৈছে বুলি অভয়াৰণ্যখনৰ বন বিষয়াই জানিবলৈ দিয়ে।
