২০০৮ চনৰ পৰা ২০১৭ লৈকে বিগত আঠ বছৰত ওদালগুৰি জিলাত মুঠতে ৪৮ টা এইচ আই ভি পজিটিভ ঘটনা চিনাক্ত কৰা হৈছে।
শুকুৰবাৰে ওদালগুৰিত জিলা স্বাস্থ্য বিষয়া ড০ গণেশ ব্ৰহ্মই এই তথ্য প্ৰকাশ কৰিছে। ড০ ব্ৰহ্মই কয় যে ২০০৮ চনৰ পৰা ২০১৬ চনলৈকে এইচআইভি পজিটিভ ব্যক্তিৰ সংখ্যা আছিল ৩৬ গৰাকী আৰু ইয়াৰে ২১ গৰাকী পুৰুষ আৰু ১৮ গৰাকী হৈছে মহিলা।
এই এইচআইভি আক্ৰান্ত ৰোগীসকলৰ মাজত ৬ গৰাকী ব্যক্তিৰ মৃত্যু ঘটিছে আৰু ইয়াৰে তিনিগৰাকী আছিল মহিলা।
তেওঁ লগতে জনায় যে ২০১৭ চনত ৯ টা নতুন এইচআইভি পজিটিভ ৰোগী চিনাক্ত কৰা হৈছে আৰু ইয়াৰ ভিতৰত পাঁচগৰাকী পুৰুষ আৰু চাৰিগৰাকী মহিলা। বৰ্তমান তেওঁলোকৰ গুৱাহাটীত চিকিৎসা চলি আছে।
ৰাজ্যখনত এইচআইভি পজিটিভ ৰোগীৰ সংখ্যা দিনক দিনে বৃদ্ধি পাই অহাটো উদ্বেগজনক বিষয় হিচাপে পৰিগণিত হৈছে। নগাঁও, কামৰূপ জিলাত সৰ্বাধিক এইচআইভি পজিটিভ ৰোগী থকাৰ তথ্যও প্ৰকাশ পাইছে। আনহাতে ওদালগুৰিৰ দৰে সৰু জিলা এখনতো উক্ত তথ্যই শংকাৰ সৃষ্টি নকৰাকৈ থকা নাই।
মাৰাত্মক এইচআইভি সংক্ৰমণ প্ৰতিৰোধৰ বাবে চৰকাৰী কাৰ্যসূচীসমূহ সঠিকভাৱে ৰূপায়ন হোৱাটো বিচাৰিছে সচেতন মহলে। এইক্ষেত্ৰত নাগৰিক সমাজ, বেচৰকাৰী সংস্থাসমূহ আৰু আৰু স্বাস্থ্য বিভাগে উমৈহতীয়া প্ৰচেষ্টাৰে আগবাঢ়িলেহে এনেধৰণৰ প্ৰতিৰোধ কাৰ্যসূচীসমূহ সফল হ’ব বুলি মত প্ৰকাশ কৰিছে বিভিন্নজনে।
