কাজিৰঙা ৰাষ্ট্ৰীয় উদ্যানত গঁড়ৰ চোৰাং চিকাৰৰ সৈতে জড়িত নৰেন শইকীয়া নামৰ এজন চোৰাং চিকাৰীক মঙলবাৰে বন বিভাগে গ্ৰেপ্তাৰ কৰিছে ৷
উল্লেখযোগ্য যে যোৱা ৩০ মে’ত গোলাঘাট আৰক্ষীয়ে ফৰকাটিং ৰে’লৱে প্লেটফৰ্মৰ পৰা আটক কৰা দুৰ্ধৰ্ষ চোৰাংচিকাৰী শৰৎ শইকীয়াৰ স্বীকাৰোক্তিৰ আধাৰতে মঙলবাৰৰ দিনা কাজিৰঙাৰ বনকৰ্মীৰ দলে নৰেন শইকীয়াক আটক কৰে ৷
নৰেন শইকীয়াই শৰৎ শইকীয়াৰ সৈতে কাজিৰঙাৰ গঁড় হত্যাত জড়িত আছিল। নৰেন শইকীয়া বোকাখাত মহকুমাৰ তামুলীপথাৰ গাঁওৰ বাসিন্দা।
মণিপুৰৰ চুৰাচান্দপুৰৰ এজন চিকাৰীৰ সৈতে লগ লাগি শৰৎ শইকীয়া নামৰ দুৰ্ধৰ্ষ চোৰাং চিকাৰীজনৰ নেতৃত্বত নৰেন শইকীয়া আৰু পাপু বৰাই কাজিৰঙাত গঁড় হত্যাৰ পৰিকল্পনা কৰিছিল ৷
ইতিমধ্যে আৰক্ষী আৰু বন বিভাগৰ যুটীয়া অভিযানকাৰী দলে কেউজনকে আটক কৰাৰ লগতে শৰৎ শইকীয়াৰ পৰা এটা ৩০৩ ৰাইফল আৰু গুলী বাৰুদ উদ্ধাৰ কৰিছে।
