কাজিৰঙাৰ সুৰক্ষাৰ কামত ব্যৱহাৰ হোৱাকৈ এখন যন্ত্ৰ চালিত নাও শুকুৰবাৰে কাজিৰঙা ৰাষ্ট্ৰীয় উদ্যান কৰ্তৃপক্ষক প্ৰদান কৰে দেশৰ আগশাৰীৰ প্ৰকৃতি সংগঠন আৰণ্যকে ৷
ৰাষ্ট্ৰীয় উদ্যানখনৰ উত্তৰ বনাঞ্চলৰ বিশ্বনাথ ঘাটত শুকুৰবাৰে আয়োজিত এক অনুষ্ঠানত আৰণ্যকৰ সচিব প্ৰধান ড৹ বিভৱ কুমাৰ তালুকদাৰে যন্ত্ৰচালিত নাওখন কাজিৰঙাৰ ডি এফ অ’ ৰোহিনী বল্লভ শইকীয়াৰ হাতত অৰ্পণ কৰে ৷ পাছত ডি এফ অ’ গৰাকীয়ে ফিটা কাটি তথা নাৰিকল ভাঙি নাওখন কাজিৰঙাৰ বাবে আনুষ্ঠানিকভাৱে মুকলি কৰে ৷
উক্ত অনুষ্ঠানত শোণিতপুৰ পশ্চিম সংমণ্ডলৰ ডি এফ অ’ সুভাষ কাদম, বিশ্বনাথৰ সামাজিক বনানিকৰণৰ ডি এফ অ’ পল্লৱ কুমাৰ ডেকা, বনাঞ্চলিক বিষয়া প্ৰাঞ্জল বৰুৱা আৰু পুষ্পধৰ বুঢ়াগোঁহাই, আৰণ্যকৰ হৈ মানস ভট্টচাৰ্য, অশোক দে আৰু আৰিফ হুছেইনৰ লগতে গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়াও উপস্থিত থাকে ৷
আহল বহল তিনিটা কোঠাৰ লগতে শৌচালয়ৰো ব্যৱস্থা থকা এই যন্ত্ৰ চালিত নাও খন উত্তৰ বনাঞ্চলৰ চোৰাংচিকাৰ প্ৰতিহত কৰাৰ কামত ব্যৱহাৰ হোৱাকৈ এটা ভ্ৰাম্যমান শিৱিৰ হিচাপে ব্যৱহাৰ কৰা হ’ব বুলি ডি এফ অ’ ৰোহিনী বল্লভ শইকীয়াই জানিবলৈ দিয়ে ৷
