পাৰ্বত্য জনজাতীয় সংঘ বা হিল ট্ৰাইব লীগে (HTL) অহা ১৬ মে’ত নাগৰিকত্ব সংশোধনী বিধেয়কৰ বিৰোধিতাৰে ধৰ্ণা কাৰ্য্যসূচী গ্ৰহণ কৰিছে। আজি কাৰ্বি ছাত্ৰ সন্থাৰ সভাগৃহত এখন সংবাদমেলত এই কথা জানিবলৈ দিয়ে সংগঠনটোৰ আহ্বায়ক খৰচিং তেৰনে।
তেৰনে কয় যে ইতিমধ্যে সংগঠনটোৱে জিলাৰ উপায়ুক্তৰ জৰিয়তে যুটীয়া সংসদীয় সমিতি, সাংসদ আৰু যুটীয়া সংসদীয় সমিতিৰ অধ্যক্ষ ৰাজেন্দ্ৰ আগ্ৰৱাললৈ বিধেয়কখনৰ বিৰোধিতা কৰি স্মাৰকপত্ৰ প্ৰেৰণ কৰিছে।
আজি সংবাদমেলত উপস্থিত থকা সংগঠনটোৰ প্ৰতিনিধিসকলে কয় যে এই বিধেয়কখন আইনত পৰিণত হ’লে অনুপ্ৰৱেশকাৰীৰ প্ৰকোপত অসমৰ খিলঞ্জীয়া জনগণৰ অস্তিত্ব বিপন্ন হৈ পৰিব। বৰ্তমান থকা মুচলমান আৰু হিন্দু বাংলাদেশীৰ লগতে আৰু অধিক হাৰত বাংলাদেশীৰ আগমন ঘটিব আৰু ত্ৰিপুৰাৰ দৰে পৰিস্থিতিৰ সৃষ্টি হ’ব। অসমত থকা থলুৱা জনগোষ্ঠীয় লোকসকলৰ ভাষিক, সাংস্কৃতিক, অৰ্থনৈতিক, ৰাজনৈতিক দিশত ই ধ্বংসাত্মক প্ৰভাৱ পেলাব।
আনহাতে সংগঠনটোৱে যুটীয়া সংসদীয় সমিতিৰ শুনানিত পক্ষপাত হোৱাৰো অভিযোগ তোলে। তেৰনে কয় যে যুটীয়া সংসদীয় সমিতিয়ে শুনানিৰ ক্ষেত্ৰত পাৰ্বত্য জনগোষ্ঠীবোৰক ইচ্ছাপূৰ্বক অৱহেলা কৰিছে। তেওঁলোকে শুনানিৰ বাবে পাৰ্বত্য জনগোষ্ঠীবোৰক মতা নাই বা ভালকৈ ইয়াৰ বিষয়ে অৱগত কৰা নাই। এই অভিযোগ তুলি সংগঠনটোৰ নেতৃবৃন্দই যুটীয়া সংসদীয় সমিতিক কাৰ্বি আংলং আৰু ডিমা হাচাও জিলাত সুকীয়াকৈ শুনানি অনুষ্ঠিত কৰিবলৈ আহ্বান জনাইছে। তেওঁলোকে কয় যে সকলো স্বাৰ্থজড়িত পক্ষকে তেওঁলোকৰ মত দিবলৈ সুযোগ দিয়া উচিত। আনহাতে বিজেপি নেতৃত্বাধীন চৰকাৰখনে অবৈধ বাংলাদেশীক খেদিম বুলি নিৰ্বাচনৰ সময়ত দিয়া প্ৰতিশ্ৰুতি প্ৰথমে পূৰণ কৰক।
তাৎপৰ্যপূৰ্ণ মন্তব্যৰে সংঘই কয় যে অবৈধ বিদেশী বিষয়টোত অসম চুক্তিখনে (দফা ৫.১ ৰ পৰা ৫.৯লৈ) নিজেই অসমৰ স্বাৰ্থত আঘাত কৰিছে। চুক্তিখনৰ ফলত ১৯৮৫ চনৰ আইন সংশোধনীৰ জৰিয়তে ১৯৫৫ চনৰ নাগৰিকত্ব আইনত ৬এ দফাটো ভৰাই চুক্তিখনে সামৰি লোৱা সকলো অবৈধ বাংলাদেশীক নাগৰিকত্ব দিয়া হ’ল। এই দফাটোৰ বৈধতা প্রশ্নবোধকৰ অন্তৰ্গত বুলি সংগঠনটোৱে কয়। সংবাদমেলত কে এছ এ, য়ু কে এছ এ, কে এছ ৱাই চি আৰু এ আই কে এন এ-ও উপস্থিত আছিল।
