কোকৰাঝাৰৰ পৰা ফুটকিবাৰীলৈ যোৱা পথটো এসপ্তাহৰ ভিতৰত মেৰামতি কৰাৰ দাবীৰে এ বি এমছু, আক্ৰাছু আৰু বিভিন্ন দল-সংগঠনে পথ অৱৰোধ কাৰ্যসূচী গ্ৰহণ কৰি ভোটগাও বজাৰ অঞ্চল উত্তাল কৰি তোলে ।
উল্লেখ্য যে কোকৰাঝাৰ চহৰৰ পৰা ধুবুৰী তথা ফুটকিবাৰীলৈ যোৱা পথছোৱা বিগত বহু দিনৰ পৰা বিধ্বস্ত হৈ আছে। এই বিধ্বস্ত পথছোৱা এসপ্তাহৰ ভিতৰত মেৰামতি কৰাৰ দাবীৰে কোকৰাঝাৰ জিলা এ বি এমছু, আক্ৰাছু আৰু বিভিন্ন দল-সংগঠনৰ সহযোগত দুঘন্টীয়া ৰাজপথ অৱৰোধ কৰে ।
পথ অৱৰোধ কাৰ্যসূচীত বহু সংখ্যক দল-সংগঠনৰ কৰ্ম কৰ্তা, ছাত্ৰ-ছাত্ৰীৰ লগতে স্থানীয় লোকে অংশগ্ৰহণ কৰে।
প্ৰতিবাদকাৰী সকলে হাতে হাতে বেনাৰ, প্লেকাৰ্ড আদি লৈ হাগ্ৰামা মহিলাৰী গ’ বেক, প্ৰমীলা ৰাণী ব্ৰহ্ম গ’ বেক, মন্ত্ৰী পৰিমল শুক্লাবৈদ্য গ’ বেক , এমচি এল এ আব্দুল আলী মণ্ডল গ’ বেক, বি জে পি সৰকাৰ হায় হায় ইত্যাদি শ্লোগানেৰে আকাশ বতাহ কপাই তোলে।
আজি ৰাতিপুৱা ১০ বজাৰ পৰা আৰম্ভ হোৱা পথ অৱৰোধৰ জৰিয়তে উক্ত পথ এসপ্তাহৰ ভিতৰতে মেৰামতি কৰাৰ লগতে পথছোৱা বহল কৰা আৰু ভোটগাও বজাৰত স্কুলীয়া ছাত্ৰ-ছাত্ৰী সকলোৰ সুৰক্ষাৰ্থে স্পীড ব্ৰেকাৰ বনাই দিয়াৰ দাবীৰে বি টি চি প্ৰধান হাগ্ৰামা মহিলাৰীলৈ কোকৰাঝাৰ জিলা উপায়ুক্তৰ জৰিয়তে এখন স্মাৰক পত্ৰ প্ৰেৰণ কৰে।
প্ৰতিবাদ স্থলীত অতিৰিক্ত জিলা উপায়ুক্ত উপস্থিত হৈ সংগঠন কেইটাই কৰা দাবী সমূহ মানি লম বুলি প্ৰতিশ্ৰুতি দিয়াতহে ১১.১৫ বজাত পথ অৱৰোধ কাৰ্যসূচী প্ৰত্যাহাৰ কৰে।
