‘দেশৰ ভৱিষ্যৎ যুৱ প্ৰজন্মৰ ওপৰত নিৰ্ভৰশীল। যুৱ প্ৰজন্মৰ চিন্তাধাৰা আৰু কাৰ্যপ্ৰণালীয়ে দেশৰ বিকাশৰ প্ৰক্ৰিয়াটোত প্ৰত্যক্ষভাৱে প্ৰভাৱিত কৰে। আমাৰ দেশখনক অধিক শক্তিশালী কৰি তুলিবলৈ হ’লে বিভিন্ন জাতি-জনগোষ্ঠী, ভাষা-ভাষী লোকৰ মাজত একতাৰ বান্ধোন শক্তিশালী কৰি তুলিব লাগিব।’ আজি ভাৰত চৰকাৰৰ ক্ৰীড়া আৰু যুৱ পৰিক্ৰমা মন্ত্ৰ্যালয়ৰ অধীনৰ নেহৰু যুৱ কেন্দ্ৰ সংগঠন, অসম আৰু গুৱাহাটী বিশ্ববিদ্যালয়ৰ ‘চেণ্টাৰ ফৰ চাউথ ইষ্ট এছিয়ান ষ্টাডিজ’, ৰাজ্য চৰকাৰৰ ক্ৰীড়া আৰু যুৱ কল্যাণ বিভাগৰ সহযোগিতাত গুৱাহাটী বিশ্ব বিদ্যালয়ৰ বিৰিঞ্চি কুমাৰ বৰুৱা প্ৰেক্ষাগৃহত আয়োজিত ৰাষ্ট্ৰীয় সংহতি শিবিৰৰ সামৰণি অনুষ্ঠানত মুখ্য অতিথি হিচাপে ভাষণ প্ৰদান কৰি মুখ্য মন্ত্ৰী সৰ্বানন্দ সোণোৱালে এইদৰে কয়।
মুখ্য মন্ত্ৰীয়ে লগতে কয় যে আমাৰ দেশখনত ৩৫ বছৰৰ অনুৰ্ধ্ব ৬৫ শতাংশ যুৱ প্ৰজন্মৰ লোক আছে। সেইবাবে প্ৰধানমন্ত্ৰীয়ে যুৱ প্ৰজন্মৰ ওপৰত অগাধ বিশ্বাস ৰাখি তেওঁলোকৰ দক্ষতা আৰু যোগ্যতা প্ৰকাশৰ বাবে ‘স্কীল ইণ্ডিয়া’ৰ দৰে কাৰ্যসূচী ৰূপায়ণ কৰি আহিছে।
এই সংহত শিবিৰে আমাৰ মাজত সম্পৰ্ক অধিক সুদৃঢ় কৰি তুলিব। যুৱ প্ৰজন্মই এই শিবিৰৰ বাৰ্তা নিজ নিজ ৰাজ্যলৈ কঢ়িয়াই লৈ যাব লাগিব বুলিও মুখ্য মন্ত্ৰীয়ে কয়।
প্ৰধান মন্ত্ৰীয়ে ‘এক্ট ইষ্ট পলিচি’ৰ যোগেদি দক্ষিণ-পূব এছিয়াৰ দেশসমূহৰ লগত সম্পৰ্ক সুদৃঢ় কৰিব বিচাৰিছে যাতে এই অঞ্চলটোৰ আৰ্থ-সামাজিক উন্নয়ন, সাংস্কৃতিক মত-বিনিময়, সম্পদৰ বিকাশ, বাণিজ্যিক সম্পৰ্ক সুদৃঢ়কৰণৰ লেখীয়া পদক্ষেপ সমূহ দ্ৰুততৰ কৰি তুলিব পৰা যায়।
আজিৰ এই অনুষ্ঠানত মুখ্য মন্ত্ৰীয়ে শৈক্ষিক বিনিময়ৰ বাবে লাওচৰ পৰা অহা ৫ গৰাকী ছাত্ৰ-ছাত্ৰীৰ লগত ভাৱ বিনিময় কৰে। অনুষ্ঠানটোত গুৱাহাটী বিশ্ব বিদ্যালয়ৰ উপাচাৰ্য ড০ মৃদুল হাজৰিকা, নেহৰু যুৱ সংগঠনৰ ৰাষ্ট্ৰীয় উপাধ্যক্ষা দিনেশ প্ৰতাপ সিং আৰু চেণ্টাৰ ফ’ৰ চাউথ ইষ্ট এছিয়ান ষ্টাডিজৰ সঞ্চালক ননী গোপাল মহন্তইও ভাষণ প্ৰদান কৰে। অনুষ্ঠানত অসম সংখ্যা লঘু ব’ৰ্ডৰ অধ্যক্ষ মমিনুল আৱাল, নেহৰু যুৱ কেন্দ্ৰৰ ব’ৰ্ড অব গৱৰ্ণৰৰ সদস্য ৰাণী ত্ৰিবেদী, নেহৰু যুৱ সংগঠনৰ উপাধ্যক্ষা দিলীপ শইকীয়া, ড০ অমিয় কুমাৰ ভূঞা প্ৰমুখ্যে গণ্য-মান্য ব্যক্তিসকল উপস্থিত আছিল। উল্লেখযোগ্য যে আজিৰ এই অনুষ্ঠানত ৮ খন ৰাজ্যৰ যুৱ প্ৰতিনিধিয়ে অংশ গ্ৰহণ কৰে।
