আজি কাহিলীপুৱা শালনা আঞ্চলিক বনবিভাগে নগাওঁ জিলাৰ চামগুৰিৰ চলচলী অঞ্চলত অভিযান চলাই দুটাকৈ কাঠ ফলা মিল জব্দ কৰিবলৈ সক্ষম হয়। জানিব পুৰা মতে দীৰ্ঘদিন ধৰি ৰুবুল আলী আৰু দিব্যজ্যোতি বৰা নামৰ লোক দুজনে নিজ বাসগৃহতে অবৈধভাবে দুটাকৈ কাঠফলা মিলেৰে চোৰাং কাঠৰ ব্যৱসায় চলাই নিছিল। এই কথা বনবিভাগৰ দৃষ্টিগোচৰ হোৱাত আজি লোক দুজনৰ ঘৰত এক অভিযান চলায়। অৱশ্যে বনবিভাগৰ লোকে দুয়োজনৰ ঘৰৰ পিছফালে থকা বাঁহবাৰীৰ পৰা কাঠফলা দুটা যন্ত্ৰ জব্দ কৰিবলৈ সক্ষম হৈছে।
লক্ষণীয় যে ৰাজ্যৰ বিভিন্ন প্ৰান্তত কোনো দুষ্টচক্ৰই অবৈধভাবে কাঠফলা মিল নিৰ্মাণ কৰি কাঠৰ ৰমৰমীয়া বেহা চলাই আহিছে। বনবিভাগৰ দ্বায়িত্ব গ্ৰহণ কৰিয়ে বনমন্ত্ৰী প্ৰমীলাৰাণী ব্ৰহ্মই এনেধৰণৰ অবৈধ কাঠমিলৰ বিৰুদ্ধে সৰব হৈ পৰাৰ লগতে ইয়াৰ বিৰুদ্ধে নিষেধাজ্ঞা জাৰি কৰিছিল। এনে পৰিপ্ৰেক্ষিতত শালনা আঞ্চলিক বনবিভাগে ধৃত চোৰাং কাঠৰ বেহা চলাই অহা লোক দুজনৰ ঘৰৰ পৰা দুটাকৈ অবৈধ কাঠমিল জব্দ কৰিবলৈ সক্ষম হয়। শালনা আঞ্চলিক বন বিষয়াই জানিবলৈ দিয়া মতে অভিযুক্ত ৰুবুল আলী আৰু দিব্যজ্যোতি বৰাই বনবিভাগৰ লোকৰ উপস্থিতিৰ উমান পাই ঘৰৰ পৰা পলায়ন কৰে। বৰ্তমান সময়ত চামগুৰি আৰক্ষীয়ে দুয়ো অভিযুক্তৰ সন্ধান কৰি আছে বুলি আৰক্ষী সুত্ৰই জানিবলৈ দিয়ে।
