এই বৈঠকত স্বচ্ছ ভাৰত অভিযান, অনাময় কাৰ্যসূচী, ৰাজহুৱা পানীযোগান ব্যৱস্থাৰ স্থিতি আদি বিভিন্ন বিষয় সম্পৰ্কে জনস্বাস্থ্য কাৰিকৰী বিভাগৰ বিষয়াসকলে মন্ত্ৰীগৰাকীক অৱগত কৰে। লগতে মন্ত্ৰীগৰাকীয়ে জিলাখনত সংশ্লিষ্ট আঁচনিসমূহৰ ৰূপায়ণত দেখা দিয়া অসুবিধাসমূহৰো বুজ লয় আৰু সেইবোৰ সোনকালে সমাধান কৰাৰ আশ্বাস দিয়ে।
মন্ত্ৰী গৰাকীয়ে ৰাজহুৱা পানীযোগান আঁচনিসমূহ সঠিকভাৱে ৰূপায়ণৰ নিৰ্দেশ দিয়াৰ লগতে বৰ্তমানে বন্ধ হৈ থকা আঁচনিসমূহ পুনৰুজ্জীৱিত কৰাৰ বাবেও প্ৰয়োজনীয় পুঁজিৰ ব্যৱস্থা কৰা হ’ব বুলি কয়। তাৰোপৰি চলিত বৰ্ষৰ ২ অক্টোবৰৰ ভিতৰত বৰ্তমানে নিৰ্মাণ কৰিবলৈ বাকী ৰোৱা ঘৰুৱা শৌচাগাৰসমূহ নিৰ্মাণৰ কাম সম্পূৰ্ণ কৰিবলৈও মন্ত্ৰীগৰাকীয়ে নিৰ্দেশ দিয়ে।
সমবায় বিভাগৰ বিষয়াসকলৰ সৈতে হোৱা আন এখন বৈঠকত মন্ত্ৰীগৰাকীয়ে বিশ্বনাথ জিলাৰ সমবায় সমিতিসমূহৰ কাম-কাজৰ পৰ্যালোচনা কৰে। পৰিবৰ্তিত পৰিস্থিতিৰ সৈতে খাপ খাব পৰাকৈ ৰাজহুৱা বিতৰণ ব্যৱস্থাৰ উপৰি অন্যান্য ব্যৱসায়িক দিশতো মনোনিবেশ কৰিবলৈ মন্ত্ৰী দৈমাৰীয়ে সমবায় সমিতিসমূহক পৰামৰ্শ দিয়ে।
আজিৰ বৈঠক দুখনত তেজপুৰ লোকসভা সমষ্টিৰ সাংসদ আৰ পি শৰ্মা, গহপুৰ সমষ্টিৰ বিধায়ক উৎপল বৰা, বিশ্বনাথ সমষ্টিৰ বিধায়ক প্ৰমোদ বৰঠাকুৰ আৰু জিলা উপায়ুক্ত ধীৰাজ জ্যোতি কলিতাৰ লগতে সংশ্লিষ্ট বিভাগ দুটাৰ জিলাৰ শীৰ্ষস্থানীয় বিষয়াসকল উপস্থিত থাকে।
