আজি বিশ্ব শিশু শ্ৰম বিৰোধী দিৱসৰ সৈতে সংগতি ৰাখি ডিব্ৰুগড় চহৰত এটা চাইকেল শোভাযাত্ৰা উলিওৱা হয়। চৌকিদিঙি খেলপথাৰত স্থানীয় বিধায়ক প্ৰশান্ত ফুকন আৰু ডিব্ৰুগড়ৰ উপায়ুক্ত লয়া মাদুৰীয়েও এই শোভাযাত্ৰাটোৰ শুভ আৰম্ভণি কৰে। শিশু শ্ৰমৰ কুপ্ৰভাৱ সম্পৰ্কে জনসাধাৰণক সজাগ কৰাৰ বাবে এই চাইকেল শোভাযাত্ৰাটোৰ আয়োজন কৰে ডিব্ৰুগড় জিলা প্ৰশাসন আৰু ডিব্ৰুগড় জিলা আইন সেৱা প্ৰাধিকৰণে। সহযোগিতা আগবঢ়াইছে ডিব্ৰুগড় জিলা ক্ৰীড়া সংস্থা আৰু ডিব্ৰুগড় চাইক্লিং ক্লাবে।
অংশগ্ৰহণকাৰীসকলৰ সৈতে হোৱা বাৰ্তালাপত উপায়ুক্ত মাদ্দুৰীয়ে কয়, ”ডিব্ৰুগড়ক শিশু শ্ৰমিক মুক্ত জিলা হিচাপে গঢ়ি তুলিবলৈ হ’লে শিশু শ্ৰম বিৰোধী বাৰ্তা জনসাধাৰণৰ মাজলৈ বহন কৰি লৈ যাব লাগিব। শিশু শ্ৰমৰ অন্ত কৰিবলৈ হ’লে নাগৰিকসকল এই ক্ষেত্ৰত আগবাঢ়ি আহিব লাগিব।” তেওঁ আৰু কয় যে জনসাধাৰণৰ মাজত সচেতনতা বিয়পাই দিবলৈ আৰু অধিক কাম কৰিব লাগিব।
উপায়ুক্ত লয়া মাদুৰীসহ শোভাযাত্ৰাকাৰীৰ দলটোৱে চৌকিদিঙি খেলপথাৰৰ পৰা ফুলবাগান হৈ আমোলাপট্টিলৈকে গৈ পুনৰ আৰম্ভণি স্থানলৈকে উভতি আহে। এই শোভাযাত্ৰাটোত অংশগ্ৰহণকাৰীসকলে প্ৰায় ৫ কি: মি: দূৰত্ব সামৰি লয়।
ডিব্ৰুগড় জিলা আইন সেৱা প্ৰাধিকৰণৰ সম্পাদক ইমদাদ আহমেদ, শিশু কল্যাণ কমিটীৰ সদস্য কিৰণ বৰা, অতিৰিক্ত জিলা উপায়ুক্ত সুভম গোৱালা, সহকাৰী আয়ুক্ত দিবাকৰ নাথ, ৰুণভ ৰামচিয়াৰী, উদয়শংকৰ দত্ত আৰু ৰশ্মিপ্ৰতাপেও এই কাৰ্যসূচীত অংশগ্ৰহণ কৰিছিল।
আনহাতে, বিশ্ব শিশু শ্ৰমিক বিৰোধী দিৱসৰ সৈতে সংগতি ৰাখি চহৰখনৰ বিভিন্ন বিদ্যালয়ৰ ছাত্ৰ-ছাত্ৰীসকলেও এটা শোভাযাত্ৰা উলিয়ায়।
