নিৰ্বাচন অভিমুখী ত্ৰিপুৰাত বিজেপিয়ে শাসনাধিষ্ঠিত বাওঁমৰ্চাক প্ৰধানকৈ লক্ষ্য কৰি লৈ তাৰ জনসাধাৰণক নিজৰ ফালে টানিবলৈ চেষ্টা কৰি আছে। সৰু ৰাজ্যখনত বিজেপিয়ে জোৰদাৰ প্ৰচাৰ চলোৱাও দেখা গৈছে একেটা কাৰণতে। যোৱা শনিবাৰে কেন্দ্ৰীয় গৃহ মন্ত্ৰী ৰাজনাথ সিঙে ৰাজ্যখন ভ্ৰমণ কৰি নিৰ্বাচনী সভাত অংশ গ্ৰহণ কৰিছিল। কিন্তু নিৰ্বাচনী সভাখনত কেন্দ্ৰীয় গৃহ মন্ত্ৰীজনে ত্ৰিপুৰাবাসীলৈ আগ বঢ়োৱা বুলি কোৱা এটা নিৰ্বাচনী প্ৰতিশ্ৰুতিক লৈ সমগ্ৰ দেশৰে সচেতন নাগৰিকসকলৰ চকু কপালত উঠিছে।
বিজেপি দলৰ টুইটাৰ হেণ্ডল bjp4tripura ৰ পৰা মন্ত্ৰীজনৰ ফটোৰ সৈতে আপল’ড কৰা এটা পোষ্টত কোৱা হৈছে ত্ৰিপুৰাত বিজেপি শাসনলৈ আহিলে বিদ্যুৎ সংযোগ নথকা প্ৰতিটো ঘৰত বিদ্যুৎ যোগান ধৰা হ’ব।
চাবলৈ গ’লে প্ৰতিশ্ৰুতিটোত আচৰিত হ’ব লগীয়া একো নাই যদিও উত্তৰ-পূবৰ ভিতৰতে বিদ্যুৎ ৰাহিৰ ক্ষেত্ৰত প্ৰথম স্থানত থকা ৰাজ্য এখনত কেন্দ্ৰীয় মন্ত্ৰীজনৰ এই নিৰ্বাচনী প্ৰতিশ্ৰুতিয়ে হাঁহিৰো খোৰাক যোগাইছে বহুতক। ৰাজ্যখনত বিদ্যুৎ সংকটৰ বাদে আন ঢেৰ সমস্যা আছে। নিবনুৱা সমস্যা, পথ যোগাযোগ ব্যৱস্থা আদি ইয়াৰ ভিতৰত ধৰিব পাৰি। কিন্তু ৰাজ্যবাসীয়ে অন্ততঃ কোনো ৰাজনৈতিক দলৰ পৰাই এনেকুৱা এটা প্ৰতিশ্ৰুতি নিশ্চয় আশা কৰি থকা নাই, যিটো প্ৰকৃততে তেওঁলোকৰ সমস্যাৰ ভিতৰতে নপৰে।
উল্লেখযোগ্য যে চৰকাৰী তথ্যমতেই উত্তৰ-পূবৰ ৰাজ্যকেইখনকে ধৰি দেশৰ ১৯খন ৰাজ্যৰ বিদ্যুৎ সংযোগ থকা আৰু নথকা গাৱঁৰ সংখ্যাৰ ক্ষেত্ৰত ত্ৰিপুৰাই দেশৰ একমাত্ৰ ৰাজ্য, য’ত সকলো গাৱঁতে বিদ্যুৎ সংযোগ দিয়া হৈছে। ত্ৰিপুৰাত পূৰ্বে ২৬ খন বিদ্যুৎ সংযোগবিহীন গাওঁ আছিল যদিও সেইবোৰতো ইতিপূৰ্বে বিদ্যুৎ সংযোগ দিয়াৰ কাম সম্পূৰ্ণ কৰা হৈছে। তেনেস্থলত কেন্দ্ৰীয় মন্ত্ৰী তথা দেশৰ এজন জ্যেষ্ঠ মন্ত্ৰীৰ এই আজৱ প্ৰতিশ্ৰুতি তেওঁৰ অজ্ঞতাৰ চিন বুলি মত দিছে সচেতন নাগৰিকসকলে।
তথ্য মতে, যোৱা বছৰৰ মাৰ্চৰ পৰা ত্ৰিপুৰাই নিজৰ উৎপাদিত বিদ্যুতৰ ১৬০ মেগাৱট বাংলাদেশলৈ ৰপ্তানি কৰিছে আৰু কেন্দ্ৰীয় চৰকাৰৰ অনুমতি পালে ওপৰঞ্চি ৪০ মেগাৱট ৰপ্তানি কৰিবলৈ সাজু হৈ আছে।
আনহাতে ৰাজনাথ সিঙৰ গৃহ ৰাজ্য উত্তৰ প্ৰদেশত এতিয়াও বিদ্যুতৰ সংকট এটা ডাঙৰ সমস্যা হৈ আছে। ইয়াৰ বিপৰীতে ২০১৪ চনৰ পৰাই ত্ৰিপুৰাই বিদ্যুৎ ৰাহি কৰি আহিছে, যিটোৰ ক্ষেত্ৰত ৰাজ্যখন সমগ্ৰ উত্তৰ-পূবৰ ভিতৰতে আগত আছে।
উল্লেখযোগ্য যে সিঙে দলৰ প্ৰাৰ্থী দিলীপ দাসৰ হৈ নিৰ্বাচনী প্ৰচাৰ চলাইছিল।
আনহাতে নিৰ্বাচনী সভাত কেন্দ্ৰীয় গৃহ মন্ত্ৰীজনে এই প্ৰতিশ্ৰুতিও দিয়ে যে বিজেপি শাসনলৈ আহিলে সাংবাদিক হত্যাৰ চি বি আই তদন্ত দিয়াব।
