আজি দৃশ্যমান হ’বলগীয়া একৈশ শতিকাৰ দীৰ্ঘতম চন্দ্ৰগ্ৰহণ প্ৰত্যক্ষ কৰাৰ বাবে গুৱাহাটী তাৰকাগৃহই বিশেষ ব্যৱস্থা গ্ৰহণ কৰিছে । জুলাইৰ ২৭ তাৰিখে নিশা ১১-৫৪ বজাত অৰ্ধগ্ৰাস চন্দ্ৰগ্ৰহণ আৰু মাজনিশাৰ পাছত অৰ্থাৎ জুলাইৰ ২৮ তাৰিখে ০১-০০বজাত পূৰ্ণগ্ৰাস চন্দ্ৰগ্ৰহণ আৰম্ভ হ’ব।
ভাৰতত এই চন্দ্ৰগ্ৰহণ ভালদৰে দেখা পোৱাৰ আশা আছিল যদিও মেঘাচ্ছন্ন আকাশ আৰু বেয়া বতৰৰ বাবে এই মহাজাগতিক পৰিঘটনাটো দেখা পোৱাত বাধাৰ সৃষ্টি হ’ব পাৰে।
উল্লেখ্য যে আজিৰ চন্দ্ৰগ্ৰহণৰ সময়ত চন্দ্ৰ, মঙলগ্ৰহ আৰু সূৰ্যই একোটা সৰলৰেখাত অৱস্থান কৰিব, অৰ্থাৎ মঙল আৰু সূৰ্যই পৰস্পৰৰ বিপৰীত দিশত অৱস্থান কৰিব আৰু পৃথিৱী সূৰ্য আৰু চন্দ্ৰৰ মাজত অৱস্থান কৰিব।
তামৰঙী হৈ পৰা চন্দ্ৰক একেই দিশত ৰঙা গ্ৰহ মঙলক দেখা পোৱা যাব। উল্লেখ্য যে স্বাভাৱিকতে যি কাৰণে সূৰ্যাস্ত আৰু সূৰ্যোদয়ৰ সময়ত সূৰ্য ৰঙচুৱা হৈ পৰে, (পৃথিৱাৰ পৰা) আকাশৰ ৰং নীলা, ঠিক সে একেই প্ৰাকৃতিক কাৰণতেই অৰ্থাৎ ৰেইলী স্কাটাৰিং প্ৰক্ৰিয়াৰ বাবে আজিৰ চন্দ্ৰটোক ৰঙচুৱা দেখা যাব।
অসমকে ধৰি সমগ্ৰ উত্তৰ-পূৰ্বাঞ্চলৰ লগতে ভাৰতৰ অন্যন্য প্ৰান্তৰ পৰা এই চন্দ্ৰগ্ৰহণ দেখা পোৱা যাব।
গুৱাহাটী তাৰকাগৃহত জুলাইৰ ১ তাৰিখৰ পৰা দৈনিক সন্ধিয়া ৬-৩০ৰ পৰা সন্ধিয়া ৭-৩০লৈকে তাৰকামণ্ডলীৰ অৱস্থান দেখুৱাই অহা হৈছে।
