চাকৰি বদলিৰ প্ৰলোভন দি ধন দাবী কৰি হাতে-লোটে ধৰা পৰিল ডিমৌৰ স্বাস্থ্য বিভাগৰ এজন কৰ্মচাৰী।
সোমবাৰে সন্ধিয়া ডিমৌ মধুপুৰৰ স্থায়ী বাসিন্দা তথা শিৱসাগৰৰ স্বাস্থ্য বিভাগৰ উচ্চপদস্থ কৰ্মচাৰী বলো বৰগোঁহাইক এগৰাকী স্বাস্থ্যকৰ্মীক অন্য ঠাইলৈ বদলি কৰি দিয়াৰ নামত নগদ ধন লোৱাৰ অভিযোগত দুৰ্নীতি নিবাৰক শাখাই হাতে-লোটে ধৰা পেলাই গ্ৰেপ্তাৰ কৰে।
পূৰ্বৰে পৰা বিভিন্নজনক চৰকাৰী চাকৰিৰ প্ৰদানৰ বিনিময়ত বৰগোঁহাইয়ে ধন সংগ্ৰহ কৰি অহাৰ অভিযোগ উত্থাপিত হৈ আহিছিল। সোমবাৰে সোণাৰীত কৰ্মৰত স্বাস্থ্যকৰ্মী অৰ্চনা পেগু নামৰ মহিলাগৰাকীক বদলিৰ প্ৰলোভন দি ধনদাবী কৰিছিল ধৃত বলো বৰগোঁহাইয়ে।
জানিব পৰা মতে মহিলা গৰাকীয়ে শিৱসাগৰ আৰক্ষী থানাত বলো বৰগোহাঁইৰ বিৰুদ্ধে অভিযোগ দিয়ে আৰু সোমবাৰে সন্ধিয়া ৫ বজাত শিৱসাগৰ আৰক্ষী আৰু দুৰ্নীতি নিবাৰক শাখাৰ এটা দলৰ তৎপৰতাত ডিমৌৰ নিজা বাসগৃহৰ পৰা বলো বৰগোঁহাইক গ্ৰেপ্তাৰ কৰা হয়।
অভিযানকাৰী দলে অভিযানকালত অভিযুক্তৰ জিম্মাৰ পৰা নগদ ৩০ হাজাৰ টকা জব্দ কৰে। ইয়াৰ পূৰ্বেও বহুতো অভিযোগ থকা বলো বৰগোহাঁইক বৰ্তমান ডিমৌ আৰক্ষী থানাত ৰাখি জেৰা চলাই থকা হৈছে।
