বহু সময়ত আমি আমাৰ নখত কিছুমান বগা দাগ পৰা দেখিবলৈ পাওঁ। এই দাগবোৰ নিজে নিজে হয় আকৌ নিজে নিজেই নোহোৱা হৈ যায়।
সেয়ে এই সন্দৰ্ভত কাকো বিশেষভাৱে চিন্তিত হোৱা দেখা নাযায়। কিন্তু ইয়াক সাধাৰণভাবে লোৱা উচিত নহয়। কাৰণ বিশেষজ্ঞসকলৰ মতে এনেধৰণৰ দাগবোৰে শৰীৰত বিভিন্ন ৰোগৰ উপস্থিতিৰ ইংগিত দিয়ে। গতিকে এই দাগবোৰ দেখিলে সাৱধান হওক। অন্যথা বিপদ অনিবাৰ্য।
এই বগা দাগবোৰ লিউকোনিচিয়াৰ ফলত হব পাৰে। ইয়াৰ উপৰিও নখৰ এই বগা দাগবোৰৰ আঁৰত আন কিছুমান কাৰণ থাকিব পাৰে। এই দাগ আৰু অন্যান্য ৰোগৰ লক্ষণসমূহ জানি লওঁ আহক…
এলাৰ্জিৰ প্ৰতিক্ৰিয়া : কেতিয়াবা নেলপলিচ, নেইল গ্লছ, বা নেলপলিচ ৰিমুভাৰ ব্যৱহাৰ কৰিলে নখত বগা দাগ দেখা যায়। আচলতে ইয়াত কিছুমান ৰাসায়নিক পদাৰ্থ থাকে যিয়ে নখৰ লগত বিক্ৰিয়া কৰি নখৰ ক্ষতি কৰে। ইয়াৰ ফলত বগা দাগ পৰে।
ভেঁকুৰৰ কাৰণ : অনিকোমাইক’ছিছ নামৰ ভেঁকুৰে নখৰ পৃষ্ঠ সহজে সংক্ৰমিত কৰিব পাৰে। এই সংক্ৰমণৰ প্ৰথম লক্ষণ হ’ল নখত বগা দাগ। ই নখৰ ওপৰেৰে সোনকালে বিয়পিব পাৰে আৰু নখটো লাহে লাহে ডাঠ আৰু ভংগুৰ হ’ব পাৰে।
আঘাত : বহু সময়ত আঘাতৰ বাবে নখৰ পৃষ্ঠভাগ ক্ষতিগ্ৰস্ত হয় আৰু তাৰ ওপৰত বগা দাগে দেখা দিয়ে। নখবোৰ যিমানেই বাঢ়ি যায় এই দাগো সিমানেই বাঢ়ি যায়। সাধাৰণতে দুৱাৰ বা খিৰিকিৰ কোণত চেপা খোৱাৰ ফলত এনে অৱস্থাৰ সৃষ্টি হয়।
ঔষধ : কেতিয়াবা ঔষধ খালেও নখত বগা দাগও হ’ব পাৰে। উদাহৰণস্বৰূপে, কেন্সাৰ চিকিৎসাৰ সময়ত কেমোথেৰাপিৰ পিছত এই লক্ষণ দেখা দিয়ে। বৃক্ক বিকল হোৱা, হৃদৰোগ, ৰক্তহীনতা, ডায়েবেটিছ ইত্যাদিৰ বাবেও নখত বগা দাগ পৰিব পাৰে।
শৰীৰত খনিজ পদাৰ্থৰ অভাৱ : শৰীৰত জিংক আৰু কেলচিয়ামৰ অভাৱৰ বাবে নখত বগা দাগ দেখা দিব পাৰে। গতিকে সুষম আহাৰ বজাই ৰাখক আৰু সকলো ধৰণৰ খাদ্য খাওক। গতিকে এনে লক্ষণক আওকাণ কৰাৰ পৰিৱৰ্তে চিকিৎসকৰ পৰামৰ্শ লোৱা উচিত।
