নগাঁও কাগজ কলৰ কৰ্মচাৰী সকলে স্থানীয় ৰাইজৰ সহযোগত তেওঁলোকৰ পাবলৈ থকা মজুৰিৰ দাবীত আৰু ৰাজ্য চৰকাৰে কাগজ কলটোক পুনৰুজ্জীৱিত কৰাত ব্যৰ্থ হোৱাৰ বিৰোধিতা কৰি জাগীৰোডত আজি এক বিশাল প্ৰতিবাদী কাৰ্যসূচী গ্ৰহণ কৰে।
তেওঁলোকে অভিযোগ কৰে যে কোনো কাৰণ নোহোৱাকৈ যোৱা এবছৰ ধৰি কাগজ কলটো বন্ধ হৈ থকাৰ উপৰি চৰকাৰে মজুৰি দিয়া বন্ধ কৰি ৰাখিছে। তেওঁলোকে জনাই যে কৰ্মচাৰী সকলে যোৱা ২৩ মাহ ধৰি মজুৰি পোৱা নায়।
প্ৰতিবাদত ভাগ লোৱা এজন শ্ৰমিকে কয় ‘যোৱা কেইবামাহো ধৰি আমি কাগজ কল দুটা পুনৰুজ্জীৱিত কৰাৰ দাবী জনাই আহিছো, কিন্তু চৰকাৰৰ ফালৰ পৰা এই ক্ষেত্ৰত কোনো ধৰণৰ সঁহাৰি পোৱা নায়।‘ তেওঁ লগতে আৰু কয় ‘আমি শংকা আৰু অনিশ্চয়তাত দিন পাৰ কৰিব লগীয়া হোৱাৰ লগতে পাব লগীয়া মজুৰি নোপোৱাৰ ফলত চৰম অনাহাৰৰ মাজত জীয়াই আছো।‘ আন এজন শ্ৰমিকে কয় ‘আমাৰ ল’ৰা-ছোৱালীৰ ভৱিষ্যত অন্ধকাৰছন্ন হৈ পৰিছে। মাচুল দিব নোৱাৰাৰ ফলত সিহঁত এতিয়া স্কুললৈ যাব নোৱাৰা হৈছে।‘ আন এজন শ্ৰমিকে কয় যে ৰাজনৈতিক নেতা সকলে বিভিন্ন সময়ত কাগজ কলটো কাৰ্যক্ষম কৰি তোলা হ’ব বুলি আশ্বাস দি আহিছে যদিও এতিয়ালৈকে এই ক্ষেত্ৰত কোনো ধৰণৰ কাৰ্যকৰী ব্যৱস্থা লোৱা দেখা পোৱা নায়।
মন কৰিব লগীয়া যে অসম উদ্যেগ তথা বাণিজ্য মন্ত্ৰী চন্দ্ৰ মোহন পাটোৱাৰীয়ে ১০ আগষ্টত মন্তব্য কৰিছিল যে কাছাৰ আৰু নগাঁৱৰ কাগজ কল দুটাৰ পুনৰুজ্জীৱিত কৰণত কেন্দ্ৰই বিশেষভাৱে গুৰুত্ব প্ৰদান কৰিছে।
উল্লেখযোগ্য যে এসময়ত ৰাজ্যৰ অৰ্থনৈতিক উন্নতিত যথেষ্ট অৱদান আগবঢ়োৱা কাছাৰ আৰু নগাঁৱৰ কাগজ কল দুটাই বৰ্তমান ঋণত ডুব গৈ আছে। ১৯৭৯ চনত স্থাপিত আৰু ১৯৮৩ চনৰ পৰা ব্যৱসায়িকভাৱে উৎপাদন আৰম্ভ কৰা নগাঁও কাগজ কলটো হিন্দুস্তান পেপাৰ ক’ৰ্পৰেচনৰ অধীনৰ চতুৰ্থটো গোট। ২০১০-২০১১ বিত্তীয় বৰ্ষত এই কাগজ কলটোৱে প্ৰায় ১.২ লাখ মেট্ৰিক টন কাগজ উৎপাদন কৰিছিল।
