যন্তৰ মন্তৰত আৰু প্ৰতিবাদ কৰিব নোৱাৰিব। তাৰ পৰিৱৰ্তে দিল্লী আৰক্ষীয়ে ৰাজধানীত প্ৰতিবাদ আৰু প্ৰতিবাদী কাৰ্যসূচীৰ বাবে তিনিটা নতুন স্থান চিনাক্ত কৰিছে। তাৰে ভিতৰত এখন হৈছে ৰামলীলা ময়দান।
কোৱা হৈছে যে আগন্তুক ডেৰ-দুমাহত ৰামলীলা ময়দানত বুকিংৰ বাবে মাত্ৰ তিনিদিনহে উপলব্ধ। ২৯, ৩০ আৰু ৩১ ডিচেম্বৰৰ বাবে খেলপথাৰ বুকিং কৰিব পৰা যাব বুলি বিষয়াসকলে জনাইছে।
ইয়াৰ লগতে গ্ৰাউণ্ডখন বুকিং কৰিবলৈ ১.২১ লাখ টকা খৰচ হ’ব। বহু বিশেষজ্ঞৰ ধাৰণা যে এই খৰচ পূৰণৰ ক্ষেত্ৰত বিৰোধীসকলে অসুবিধাৰ সন্মুখীন হ’ব।
ৰামলীলা ময়দান এখন বিশাল খেলপথাৰ। ইয়াৰ মাটিকালি প্ৰায় ১২ একৰ। এই খেলপথাৰত একেলগে প্ৰায় ৫০ হাজাৰ লোক সমবেত হ’ব পাৰে। এইটো নিশ্চিতভাৱে ভাল দিশ।
কিন্তু এই খেলপথাৰ বুকিং কৰাৰ ক্ষেত্ৰতো সমস্যাৰ সৃষ্টি হৈছে। জানি আচৰিত হ’ব যে এদিনৰ বাবে ৰামলীলা ময়দানৰ বুকিং খৰচ ১.২১ লাখ টকা। যদিও ইয়াৰ ভিতৰত ছিকিউৰিটি মানি অন্তৰ্ভুক্ত। তাৰ লগতে অন্তৰ্ভুক্ত আছে কৰও।
দৰাচলতে দিল্লী আৰক্ষীয়ে যন্তৰ মন্তৰক প্ৰতিবাদস্থলী হিচাপে বাতিল কৰিছে। ইয়াৰ মাত্ৰ এদিন পিছতেই এই তথ্য পোহৰলৈ আহিছে।
১১ অক্টোবৰত আৰক্ষী আয়ুক্ত অনুৰাগ কুমাৰে এক নিৰ্দেশ জাৰি কৰিছিল। সেই নিৰ্দেশত যন্তৰ মন্তৰৰ সলনি উত্তৰ দিল্লীৰ ৰামলীলা ময়দান, বুৰাৰী ময়দান আৰু পূব দিল্লীৰ চিবিডি ময়দানক নতুন প্ৰতিবাদস্থলী হিচাপে নিৰ্ধাৰণ কৰা হৈছে। এই তিনিওটা স্থানত প্ৰতিবাদ চলোৱাৰ বাবে সংশোধিত ষ্টেণ্ডাৰ্ড অপাৰেটিং প্ৰচিডিউৰ বা এছ অ’ পি জাৰি কৰা হ’ব বুলি আৰক্ষীয়ে জানিবলৈ দিয়ে।
ৰামলীলা ময়দানত প্ৰতিবাদ সাব্যস্ত কৰাৰ খৰচ অতি বেছি। বিষয়াসকলে কয় যে ৰামলীলা ময়দান বুকিং কৰিবলৈ প্ৰতিদিনে ৫০ হাজাৰ টকা দিব লাগিব। ইয়াৰ উপৰিও ৫৫ হাজাৰ টকা ছিকিউৰিটি মানি হিচাপে জমা কৰিব লাগিব। ফলত কৰসহ এদিনীয়া বুকিঙৰ প্ৰাৰম্ভিক খৰছ ১.২১ লাখ টকা। আৰু এইটো এটা ডাঙৰ অংক। এনেদৰে প্ৰতিবাদ কৰিব বিচাৰিলে বিৰোধীৰ খৰচ বহুত বাঢ়িব।
দিল্লী পৌৰ নিগমৰ উদ্যান শস্য বিভাগৰ জৰিয়তে খেলপথাৰ বুকিং কৰিব লাগিব। এই বিভাগে খেলপথাৰখন ব্যৱহাৰৰ অনুমতি দিয়ে। কিন্তু পৌৰ নিগমে প্ৰত্যক্ষভাৱে এই প্ৰতিবাদত অনুমোদন দিব নোৱাৰে। তাৰ আগতে দিল্লী আৰক্ষীৰ পৰা No Objection Certificate বা NOC লোৱাটো বাধ্যতামূলক।
পৌৰ নিগমৰ বিষয়াসকলে দাবী কৰিছে যে খেলপথাৰৰ সৰু অংশ বিনামূলীয়াকৈ প্ৰতিবাদ আৰু সমাৱেশৰ বাবে ব্যৱহাৰ কৰিব পাৰি। অৱশ্যে তাত প্ৰায় ১৫০ জন লোকহে সমবেত হ’ব পাৰে।
আৰু বুকিঙৰ এই বৃহৎ খৰচেই সমস্যাৰ কাৰণ। ফলত এই খেলপথাৰত প্ৰতিবাদ বা বিক্ষোভৰ আয়োজন কৰাটো কঠিন হৈ পৰিব পাৰে। বিশেষকৈ যন্তৰ মন্তৰৰ তুলনাত এই পাৰ্থক্য স্পষ্ট। প্ৰতিবাদকাৰীসকলে কয় যে তাত প্ৰতিবাদৰ বাবে এনে কোনো ধন দিব নালাগিছিল।
অৱশ্যে বিষয়টো স্পষ্ট কৰি দিলে এজন বিষয়াই। তেওঁ কয়, ‘যদি গ্ৰাউণ্ডখন বিনামূলীয়াকৈ প্ৰতিবাদৰ বাবে ব্যৱহাৰ কৰিবলৈ দিয়া হয়, তেন্তে পৌৰ নিগমে প্ৰতিদিনে কমেও ৫০ হাজাৰ টকা বা তাতকৈ অধিক ৰাজহ হেৰুৱাব।’
দিল্লী আৰক্ষীয়ে ৰামলীলা ময়দানক প্ৰতিবাদস্থলী হিচাপে নিৰ্ধাৰণ কৰাৰ সিদ্ধান্ত লৈছে আৰু আম আদমি পাৰ্টিৰ দিল্লীৰ সভাপতি সৌৰভ ভৰদ্বাজে এই বিষয়ত প্ৰশ্ন উত্থাপন কৰিছে। ইতিমধ্যে বিভিন্ন অনুষ্ঠানৰ বাবে খেলপথাৰ বুকিং কৰা হৈছে বুলিও তেওঁ কয়।
এক্সৰ এটা পোষ্টত তেওঁ লিখিছে, ‘চৰকাৰে পুনৰ নাগৰিকক প্ৰতাৰণা কৰিছে। ইতিমধ্যে ৰামলীলা ময়দানত দুখন ৰামলীলাৰ আয়োজন কৰা হৈছে।’ তাত প্ৰতিবাদ কৰাটো কেনেকৈ সম্ভৱ সেই প্ৰশ্নও উত্থাপন কৰে। তেওঁৰ ভাষাত ‘তেওঁলোকে বিশৃংখলতা সৃষ্টি কৰিব বিচাৰে নেকি?’
পৌৰনিগমৰ বিষয়াসকলে জনোৱা মতে, ইতিমধ্যে বিভিন্ন অনুষ্ঠান আৰু উৎসৱৰ বাবে খেলপথাৰ বুকিং কৰা হৈছে। আগন্তুক কেইটামান সপ্তাহত দশেৰা আৰু দীপাৱলীৰ দৰে ডাঙৰ উৎসৱৰো আয়োজন কৰা হৈছে।
