”অসমলৈ আহি আছে ভয়াবহ সংকট! কেন্দ্ৰীয় চৰকাৰে নাগৰিকত্ব সংশোধনী বিধেয়ক, ২০১৬ ৰ জৰিয়তে বিদেশী লোকসকলক ভাৰতীয় নাগৰিকত্ব প্ৰদানৰ জৰিয়তে ভাৰতত সংস্থাপিত কৰিবলৈ সিদ্ধান্ত গ্ৰহণ কৰিছে। ভাৰতৰ সংবিধানৰ সমতা আৰু ধৰ্মনিৰপেক্ষতাৰ আদৰ্শক দলিয়াই ধৰ্মৰ ভিত্তিত নাগৰিকত্ব প্ৰদানৰ ভয়ংকৰ পদক্ষেপ ল’বলৈ গৈছে বিজেপি চৰকাৰে। বিজেপি চৰকাৰৰ এই সংবিধান আৰু দেশ বিৰোধী সিদ্ধান্তই অসম আৰু অসমবাসীক আটাইতকৈ ক্ষতিগ্ৰস্ত কৰিব।” এই মন্তব্য কৃষক-শ্ৰমিক-শ্ৰমিক উন্নয়ন পৰিষদৰ নগাঁও জিলা সমিতিৰ।
নগাঁও জিলাৰ উপায়ুক্ত কাৰ্যালয়ৰ সমীপত নাগৰিকত্ব সংশোধনী বিধেয়ক বাতিলৰ দাবীত আজিৰ পৰা অনিৰ্দিষ্টকালীন অনশন কাৰ্যসূচী অনুষ্ঠিত কৰি সংগঠনটোৱে এনেদৰে মন্তব্য কৰে। বিভিন্ন ধৰণৰ প্ৰতিবাদধৰ্মী প্লেকাৰ্ড সন্নিৱিষ্ট কৰি আৰম্ভ কৰা এই অনশন কাৰ্যসূচীত ৰাজনৈতিক-অৰাজনৈতিক সংগঠনে অংশগ্ৰহণ কৰে।
সংগঠনটোৱে লগতে কয় যে- অসমলৈ পূৰ্ব বংগমূলীয় মুছলমানৰ প্ৰব্ৰজনৰ ফলত ইতিমধ্যে অসমৰ জনগাঁথনিৰ স্থায়ী পৰিবৰ্তন ঘটিছে। ১৯৭১ চনলৈ প্ৰব্ৰজনকাৰীৰ বোজা ল’বলৈ অসম বাধ্য হৈছে। এতিয়া অসম ধ্বংস কৰিবলৈ আৰু অধিক বিদেশীৰ বোজা আমি কোনোপধ্যে ল’ব নোৱাৰো। বিধেয়কখন আইনত পৰিণত হ’লে অসমত অবৈধভাৱে বসবাস কৰা বাংলাদেশীৰ উপৰি বাংলাদেশত থকা বঙালী হিন্দুক বৈধ অসমীয়াৰ স্বীকৃতি দিব। ইয়াৰ ফলত অসমীয়াৰ যে বিপদ হ’ব সেইটো খাটাং। তদুপৰি এই বিধেয়ক গৃহীত হ’লে অসমবাসীৰ দীৰ্ঘদিনীয়া জাতীয় স্বপ্ন এন আৰ চিৰ প্ৰস্তুতিকৰণ প্ৰক্ৰিয়াত ব্যাঘাত জন্মিব।
প্ৰায় ডেৰ শতাধিক লোকৰ উপস্থিতি থকা আজিৰ কাৰ্যসূচীত কৃষক-শ্ৰমিক উন্নয়ণ পৰিষদৰ কেন্দ্ৰীয় সমিতিৰ সভাপতি-মুকুল বৰা উপস্থিত থাকি বিজেপি চৰকাৰখনক ক্ষুৰধাৰ সমালোচনা কৰে। বিশেষকৈ তেওঁ কেন্দ্ৰীয় মন্ত্ৰী ৰাজেন গোঁহাই, মুখ্যমন্ত্ৰী সৰ্বানন্দ সোণোৱাল, মন্ত্ৰী হিমন্ত বিশ্ব শৰ্মা, অতুল বৰা, কেশৱ মহন্ত, ফণীভুষণ চৌধুৰীক আক্ৰমণৰ লক্ষ্য কৰি লয়।। আজিৰ এই কাৰ্যসূচীত সংগঠনটোৰ কেন্দ্ৰীয় সম্পাদক উৎপল কুমাৰ বৰুৱাও উপস্থিত থাকে।
