দিল্লীৰ যন্তৰ-মন্তৰত অনুষ্ঠিত প্ৰতিবাদৰ সমান্তৰালভাৱে গুৱাহাটীৰ চচলতো ভাৰতৰ মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত প্ৰতিবাদ সাব্যস্ত কৰে শিল্পী-সাহিত্যিক, বুদ্ধিজীৱী, ৰাজনীতিক আৰু ছাত্ৰ-ছাত্ৰীসকলে। শনিবাৰে চচলত অনুষ্ঠিত এই প্ৰতিবাদী কাৰ্যসূচীত শতাধিক লোকৰ উপস্থিতি পৰিলক্ষিত হয়।
প্ৰতিবাদস্থলীত উপস্থিত হৈ অংশগ্ৰহণকাৰীসকলে জ্ঞানেশ কুমাৰৰ পদত্যাগৰ দাবী উত্থাপন কৰাৰ লগতে গণতান্ত্ৰিক অধিকাৰ আৰু নিৰ্বাচনী ব্যৱস্থাৰ স্বচ্ছতাক লৈ নিজৰ প্ৰতিবাদ সাব্যস্ত কৰে। এই কাৰ্যসূচীত কংগ্ৰেছ নেতা ৰিপুণ বৰা, সাংবাদিক পৰেশ মালাকাৰ, লেখক ড০ অপূৰ্ব কুমাৰ বৰুৱা, বুৰঞ্জীবিদ ড০ মনোৰমা শৰ্মা, চিপিআই এমৰ নেতা নিৰংকুশ নাথ, অধিবক্তা কৃষ্ণ গগৈ, ভূমি অধিকাৰ কৰ্মী সুব্ৰত তালুকদাৰ, ছাত্ৰ মুক্তি সংগ্ৰাম সমিতিৰ নেতা পিন্টু গগৈ, নিখিল ভাৰতীয় কৃষক সভাৰ নেতা জয়ন্ত গগৈ, নাট্যকৰ্মী বিৰিঞ্চি বৰা, অজাপৰ সভাপতি লুৰীনজ্যোতি গগৈ, কংগ্ৰেছ নেত্ৰী মীৰা বৰঠাকুৰ আৰু পলাক্ষী দাসকে ধৰি কেইবাগৰাকীও বিশিষ্ট ব্যক্তি উপস্থিত থাকে। ইয়াৰ উপৰিও ৰাভা হাচঙৰ পৰা অৰ্ধ শতাধিক ভূমি অধিকাৰ কৰ্মীয়ে প্ৰতিবাদী অনুষ্ঠানটোত অংশগ্ৰহণ কৰি ক্ষোভ উজাৰে।
প্ৰতিবাদী অনুষ্ঠানটোত প্ৰতিবাদকাৰীসকলে বিজেপি চৰকাৰক তীব্ৰ সমালোচনা কৰাৰ লগতে জ্ঞানেশ কুমাৰৰ পদত্যাগৰ দাবীত ধৰ্ণা দিয়ে। শাৰীৰিক অসুস্থতাৰ বাবে উপস্থিত থাকিব নোৱাৰিলেও ফোনযোগে নিজৰ বক্তব্য প্ৰেৰণ কৰে চিন্তাবিদ ড০ হীৰেন গোহাঁইয়ে। অনুষ্ঠানটোত শিল্পী অৰ্ঘদ্বীপ বৰুৱা, নিৰংকুশ নাথ, বিদিশা বৰ্মন আদিয়ে প্ৰতিবাদী গীত পৰিৱেশন কৰাৰ লগতে যুৱ কবি কোকিল শইকীয়াই এটা স্বৰচিত প্ৰতিবাদী কবিতা পাঠ কৰে।
চচলত সত্যাগ্ৰহ আৰু ধৰ্ণা কাৰ্যসূচী সমাপ্ত কৰাৰ পাছত প্ৰতিবাদকাৰীসকলে পথলৈ ওলাই আহি প্ৰতিবাদ অব্যাহত ৰাখিব বিচাৰিছিল। কিন্তু সেই সময়তে আৰক্ষীয়ে তেওঁলোকক আগবাঢ়ি যোৱাত বাধা প্ৰদান কৰে। ফলত প্ৰতিবাদকাৰী আৰু আৰক্ষীৰ মাজত হতাহতিৰ পৰিস্থিতিৰ সৃষ্টি হয় বুলি জানিব পৰা গৈছে।
দিল্লীৰ যন্তৰ-মন্তৰত একে দাবীত প্ৰতিবাদ অনুষ্ঠিত হোৱাৰ সময়তে গুৱাহাটীৰ চচলতো এই প্ৰতিবাদে বিশেষ তাৎপৰ্য বহন কৰিছে। জ্ঞানেশ কুমাৰৰ পদত্যাগৰ দাবীত শিল্পী, সাহিত্যিক, বুদ্ধিজীৱী, ৰাজনৈতিক নেতা আৰু ছাত্ৰ-ছাত্ৰীৰ অংশগ্ৰহণেৰে অনুষ্ঠিত এই কাৰ্যসূচীৰ জৰিয়তে প্ৰতিবাদকাৰীসকলে নিৰ্বাচনী ব্যৱস্থাৰ ব্যাপক কেলেংকাৰীৰ প্ৰতি ৰাইজৰ দৃষ্টি আকৰ্ষণৰ চেষ্টা কৰে।
