অসমৰ ভ্ৰাম্যমাণ থিয়েটাৰৰ জগতত পাঁচ দশকজোৰা গৌৰৱোজ্জ্বল যাত্ৰাৰ সামৰণি পৰিব নেকি কোহিনুৰ থিয়েটাৰৰ? পৰিচালক তপন লহকৰে সামাজিক মাধ্যমত দিয়া এটা পোষ্টক কেন্দ্ৰ কৰি এতিয়া সৃষ্টি হৈছে ব্যাপক চৰ্চাৰ। “বহুত কথা আছে… But No More Kohinoor Theatre” বুলি লিখি মনৰ দুখ প্ৰকাশ কৰিছে তপন লহকৰে। তেওঁৰ এই পোষ্টৰ পাছতে অসমৰ জনপ্ৰিয় ভ্ৰাম্যমাণ নাট্যদলটোৰ ভৱিষ্যতক লৈ অনুৰাগীৰ মাজত দেখা দিছে অনিশ্চয়তা।
বিগত এবছৰত কোহিনুৰ থিয়েটাৰৰ সৈতে থকা সম্পৰ্ক আৰু অভিজ্ঞতাৰ কথা সোঁৱৰণ কৰি তপন লহকৰে এই পোষ্টটো দিছে। অৱশ্যে, থিয়েটাৰ দলটোৰ যাত্ৰা সঁচাকৈয়ে বন্ধ হ’ব নেকি, সেই বিষয়ে তেওঁ স্পষ্টকৈ একো ঘোষণা কৰা নাই। তথাপি তেওঁৰ পোষ্টত প্ৰকাশ পোৱা দুখে নাট্যপ্ৰেমীসকলৰ মনত বহু প্ৰশ্নৰ অৱতাৰণা কৰিছে।
১৯৭৬ চনত বিশিষ্ট নাট্যব্যক্তিত্ব ৰতন লহকৰে প্ৰতিষ্ঠা কৰিছিল কোহিনুৰ থিয়েটাৰ। বজালী জিলাৰ পাঠশালাক কেন্দ্ৰ কৰি গঢ় লৈ উঠা এই নাট্যদলটোৱে অসমৰ ভ্ৰাম্যমাণ থিয়েটাৰৰ বিকাশত গুৰুত্বপূৰ্ণ ভূমিকা পালন কৰি আহিছে। দশক দশক ধৰি নতুন চিন্তা, উন্নত মঞ্চসজ্জা আৰু ব্যতিক্ৰমী নাট্য উপস্থাপনেৰে দৰ্শকৰ মন জয় কৰিবলৈ সক্ষম হৈছিল কোহিনুৰ থিয়েটাৰে।
২০১৭ চনত ৰতন লহকৰৰ মৃত্যুৰ পাছত পুত্ৰ তপন লহকৰে থিয়েটাৰ দলটোৰ দায়িত্ব গ্ৰহণ কৰে। পিতৃৰ সৃষ্টিৰাজি আৰু নাট্যধাৰা আগবঢ়াই নিয়াৰ লগতে তেওঁ অসমৰ বিভিন্ন ঠাইত নাট্য প্ৰদৰ্শনৰ জৰিয়তে কোহিনুৰ থিয়েটাৰৰ জনপ্ৰিয়তা অক্ষুণ্ণ ৰখাৰ চেষ্টা চলাই আহিছে।
কেৱল পৰম্পৰাগত নাট্য উপস্থাপনতে সীমাবদ্ধ নাথাকি কোহিনুৰ থিয়েটাৰে মঞ্চত নতুন প্ৰযুক্তি আৰু অভিনৱ কৌশলৰ ব্যৱহাৰেৰে দৰ্শকক আকৰ্ষণ কৰিছিল। ‘টাইটানিক’ আৰু ‘জুৰাছিক পাৰ্ক’ৰ দৰে বিশ্ববিখ্যাত কাহিনীক ভ্ৰাম্যমাণ থিয়েটাৰৰ মঞ্চত উপস্থাপন কৰি দলটোৱে বিশেষ পৰিচিতি লাভ কৰিছিল। বিশাল মঞ্চসজ্জা, কাৰিকৰী কৌশল আৰু দৃশ্যগত উপস্থাপনেৰে অসমৰ ভ্ৰাম্যমাণ থিয়েটাৰক এক নতুন মাত্ৰা প্ৰদান কৰিছিল কোহিনুৰে।
অসমৰ সীমা অতিক্ৰম কৰিও কোহিনুৰ থিয়েটাৰে নিজৰ পৰিচয় দাঙি ধৰিবলৈ সক্ষম হৈছিল। ২০১০ চনত ৰাষ্ট্ৰীয় নাট্য বিদ্যালয়ৰ আমন্ত্ৰণত নতুন দিল্লীত নাট্য প্ৰদৰ্শন কৰিছিল দলটোৱে। এই পদক্ষেপে অসমৰ ভ্ৰাম্যমাণ থিয়েটাৰক ৰাষ্ট্ৰীয় পৰ্যায়ত প্ৰতিনিধিত্ব কৰাৰ ক্ষেত্ৰত গুৰুত্বপূৰ্ণ ভূমিকা লৈছিল।
গাঁৱৰ পৰা চহৰলৈ, অসমৰ ইমূৰৰ পৰা সিমূৰলৈ নাটক লৈ ঘূৰি ফুৰা ভ্ৰাম্যমাণ থিয়েটাৰ অসমৰ এক সুকীয়া সাংস্কৃতিক পৰম্পৰা। এই পৰম্পৰাক সমৃদ্ধ কৰা কোহিনুৰ থিয়েটাৰৰ যাত্ৰা সঁচাকৈয়ে থমকি ৰ’ব নেকি, সেয়া এতিয়াও স্পষ্ট নহয়। কিন্তু তপন লহকৰৰ ‘No More Kohinoor Theatre’ পোষ্টে ইতিমধ্যে বহু নাট্যপ্ৰেমীৰ মনত বিষাদৰ ছাঁ পেলাইছে। পাঁচ দশকৰ স্মৃতি আৰু অসংখ্য দৰ্শকৰ আবেগেৰে জড়িত এই নাট্যদলটোৰ ভৱিষ্যৎ সন্দৰ্ভত এতিয়া সকলোৰে দৃষ্টি তপন লহকৰৰ পৰৱৰ্তী সিদ্ধান্তলৈ।
