নাগৰিকত্ব সংশোধনী বিধেয়ক ২০১৬ বাতিলৰ দাবীত কৃষক-শ্ৰমিক উন্নয়ন পৰিষদৰ নগাঁও জিলা সমিতিয়ে জিলাখনৰ উপায়ুক্ত কাৰ্যালয়ৰ সমীপত গ্ৰহণ কৰা অনিৰ্দিষ্টকালীন অনশন কাৰ্যসূচীয়ে দুটা দিন অতিক্ৰম কৰিবলৈ অগ্ৰসৰ হৈছে।
কালি দিনৰ ১০ বজাৰ পৰা আৰম্ভ হোৱা অনশন কাৰ্যসূচীত জিলাখনৰ বহু কেইটা ৰাজনৈতিক-অৰাজনৈতিক দল-সংগঠনে স্বতঃস্ফূৰ্তভাৱে অংশগ্ৰহণ কৰি কেন্দ্ৰীয় চৰকাৰে গৃহীত কৰিবলৈ অহৰ্নিশে চেষ্টা চলাই থকা এই জাতিধ্বংসী নাগৰিকত্ব বিধেয়কখন বাতিল কৰিবলৈ স্পষ্টভাৱে দাবী জনায়।
নাগৰিকত্ব সংশোধনী বিধেয়ক ২০১৬ বাতিলৰ দাবীত নগাঁৱত কৃষক-শ্ৰমিক উন্নয়ন পৰিষদে পালন কৰা অনিৰ্দিষ্টকালীন অনশন এই মুহূৰ্তলৈকে শান্তিপূৰ্ণভাৱে চলি থকাৰ লগতে ইয়াত জিলাখনৰ বিভিন্ন স্তৰৰ বিভিন্নজন লোক উপস্থিত থাকি অনশনকাৰীসকলক উৎসাহ প্ৰদান কৰিছেহি।
উল্লেখযোগ্য যে, অনশনকাৰীসকলে এক গুৰুত্বপূৰ্ণ অভিযোগ উত্থাপন কৰি সংবাদ মাধ্যমক জানিবলৈ দিয়ে যে- জিলাখনৰ উপায়ুক্ত কাৰ্যালয়ৰ সন্মুখত অনশন কাৰ্যসূচী ৰূপায়নৰ ৩০ ঘণ্টা অতিক্ৰম হোৱাৰ পিচতো এই মুহূৰ্তলৈকে জিলা প্ৰশাসনৰ তৰফৰ পৰা কোনোৱেই অনশনকাৰীসকলক সাক্ষাৎ কৰা নাই।
আনহাতে এই অনশনত প্ৰতি জিলা অগপৰ ধৰ্মীয় সংখ্যালঘু পৰিষদ, প্ৰাক্তন আলফা ঐক্য মঞ্চ, অনুসূচিত জাতি যুৱ পৰিষদৰ জিলা সমিতি, অসম যুৱ পৰিষদৰ জিলা সমিতিৰ বিষয়-ববীয়াসকলে পূৰ্ণ সমৰ্থন আগবঢ়াইছে।
