নিবাৰণ বৰা স্মৃতিৰক্ষা সমিতিয়ে আজি ২৬ এপ্ৰিলত গুৱাহাটীত নেতাজনৰ ৯৮ সংখ্যক জন্ম দিৱস পালন কৰে। ‘হিন্দী বলয়ৰ গ্ৰাসৰ পৰা উত্তৰ-পূবৰ ৰাইজক ৰক্ষা কৰিবলৈ অসমত জাতীয়তাবাদী আন্দোলনৰ ধাৰা প্ৰতিষ্ঠা কৰা মহানায়ক’ নিবাৰণ বৰা ( Nibaran Bora )ৰ জন্ম দিৱসত জাতীয়তাবাদী বিভিন্ন নেতা-কৰ্মীয়ে শ্ৰদ্ধা নিবেদন কৰে।
‘দিল্লীৰ বিৰুদ্ধে যুঁজিবলৈ অসমৰ বহুবিভক্ত জাতীয়তাবাদী শিবিৰক একত্ৰিত কৰাৰ বাবে’ এখন অভিৱৰ্তন অনুষ্ঠিত কৰাৰ বাবে আজিৰ অনুষ্ঠানতে সিদ্ধান্ত লোৱা হয়।
‘অসমৰ পৰা বিদেশী বহিষ্কৰণ দূৰৰ কথা হিন্দু বাংলাদেশীক নাগৰিকত্ব দিবলৈ কেন্দ্ৰীয় চৰকাৰ উঠি-পৰি লাগিছে‘ বুলি বিজেপি চৰকাৰৰ বিৰুদ্ধে ক্ষোভ উজাৰি অনুষ্ঠানত উপস্থিত থকা নিবাৰণ বৰাৰ পুত্ৰ ভাস্কৰ কিৰণ বৰাই নৰ্থ ইষ্ট নাও-ক কয় ‘তেওঁ ১৯৭৭ চনতে অসমৰ ৰাজনৈতিক সমস্যাসমূহ ফঁহিয়াই দেখুৱাইছিল। বিদেশী সমস্যাটো অসমবাসীৰ কাৰণে কিমান ভয়াৱহ হ’ব পাৰে তাকো তেওঁ তথ্য সহকাৰে দাঙি ধৰিছিল।’
নিবাৰণ বৰাৰ নামত এখন মঞ্চ নিৰ্মাণ কৰিবৰ বাবে কৰা অনুৰোধ মুখ্য মন্ত্ৰী সৰ্বানন্দ সোণোৱালে ৰক্ষা কৰিব বুলি ‘মৌখিক প্ৰতিশ্ৰুতি দিছিল’ যদিও আজিপৰ্য্যন্ত কোনো পদক্ষেপ হাতত লোৱা নাই বুলি ক্ষোভ প্ৰকাশ কৰে বৰাই।
আনহাতে ‘নেতাগৰাকীৰ নামত গুৱাহাটীত এটা পুথিভঁড়াল নিৰ্মাণৰ বাবে মাটি আৰু গুৱাহাটীৰ এটা প্ৰধান আলিবাট তেওঁৰ নামেৰে নামকৰণ কৰাকে ধৰি মুঠ ৮টা দাবী’ সমিতিয়ে কৰি অহাৰ পিছতো ২০০৫ চনৰ পৰা আজি পৰ্য্যন্ত কোনো চৰকাৰেই গুৰুত্ব নিদিয়াক লৈও সভাখনত ক্ষোভ প্ৰকাশ কৰা হয়।
চিৰিয়াখানা সুৰক্ষা সমিতিৰ কাৰ্য্যালয়ত অনুষ্ঠিত সভাখনত অধিবক্তা সত্যেন্দ্ৰ প্ৰসাদ ডেকা, অসম সংগ্ৰামী মঞ্চৰ নেতা দিগন্ত কোঁৱৰ আৰু সমৰজ্যোতি বেজবৰুৱা, বৰাৰ পুত্ৰ-বোৱাৰী ভাস্কৰ কিৰণ বৰা আৰু প্ৰিয়ম বৰা, চিৰিয়াখানা সুৰক্ষা মঞ্চৰ দীপক কুমাৰ পাঠক, ৰাজকুমাৰ বৈশ্য আৰু তিলক মহন, প্ৰদীপ কুমাৰ নেওগ, লক্ষীপ্ৰসাদৰ প্ৰমুখ্যে বহুসংখ্যক অনুগামী উপস্থিত থাকে।
