চলি থকা অসম উচ্চতৰ মাধ্যমিকৰ চূড়ান্ত পৰীক্ষাৰ বিজ্ঞান শাখাৰ ৰসায়ন বিজ্ঞান, গণিত আৰু পদাৰ্থ বিজ্ঞানৰ প্ৰশ্নকাকত ফাদিল হৈছে বুলি উঠা অভিযোগ অস্বীকাৰ কৰিছে উচ্চতৰ মাধ্যমিক শিক্ষা সংসদে।
উল্লেখযোগ্য যে সংসদৰ দ্বাৰা পৰিচালিত উচ্চতৰ মাধ্যমিকৰ চূড়ান্ত পৰীক্ষা চলি আছে। কিন্তু অলপতে এই খবৰ বনজুইৰ দৰে বিয়পি পৰিছিল যে অহা ৯ মাৰ্চত হ’ব লগা পদাৰ্থ বিজ্ঞানৰ পৰীক্ষাৰ প্ৰশ্ন কাকত ইতিমধ্যে ফাদিল হৈছে।
এই সন্দৰ্ভত পৰীক্ষাৰ্থী আৰু অভিভাৱক যাতে বিভ্ৰান্তিত নপৰে, তাৰ বাবে কালি উচ্চতৰ মাধ্যমিক শিক্ষা সংসদৰ তৰফৰ পৰা স্পষ্ট কৰি দিয়া হৈছে যে এই খবৰৰ কোনো ভিত্তি নাই। অৰ্থাৎ পদাৰ্থ বিজ্ঞানৰ পৰীক্ষাৰ প্ৰশ্ন কাকত ফাদিল হোৱা নাই আৰু উক্ত বিষয়ৰ পৰীক্ষা ৯ মাৰ্চতেই হ’ব।
উল্লেখযোগ্য যে গোৱালপাৰাৰ ভালুকডুবি ছায়েন্স একাডেমি নামৰ এখন বেচৰকাৰী শিক্ষানুষ্ঠানে আৰ্হি কাকত হিচাপে উলিওৱা কাকতখনেই ৯ মাৰ্চত হ’ব লগা পদাৰ্থ বিজ্ঞানৰ চূড়ান্ত পৰীক্ষাৰো কাকত বুলি যোৱা সোমবাৰৰ পৰা খবৰ বিয়পি পৰিছিল। তাৰ ফলত পৰীক্ষাৰ্থীৰ লগতে অভিভাৱকসকল চিন্তিত হোৱা দেখা গৈছিল।
আনহাতে আন এটা অভিযোগমতে উপৰোক্ত বেচৰকাৰী বিদ্যালয়ৰে ৰসায়ন বিজ্ঞান আৰু গণিতৰ আৰ্হি কাকতকেইখন উক্ত বিষয়কেইটাৰ হৈ যোৱা পৰীক্ষাকেইটাৰ কাকতৰ সৈতে ৮০ শতাংশ মিলি গৈছিল।
কিন্তু এই অভিযোগ পোৱাৰ পিছত উচ্চতৰ মাধ্যমিক শিক্ষা সংসদৰ সচিবপ্ৰধান কমল গগৈ আৰু পৰীক্ষা নিয়ন্ত্ৰক জ্যোতি কলিতা গোৱালপাৰা জিলাৰ বিদ্যালয়সমূহৰ পৰিদৰ্শকৰ কাৰ্য্যালয়ত উপস্থিত হৈ বিষয়টোক প্ৰাথমিক তদন্ত কৰাৰ পিছত এই অভিযোগ ভিত্তিহীন বুলি প্ৰমাণ হয়।
ইয়াৰ পিছতে উচ্চতৰ মাধ্যমিক শিক্ষা সংসদে এইবোৰ উৰা বাতৰিত ভোল নাযাবলৈ আৰু পৰীক্ষা পূৰ্বৰ সূচীমতেই হ’ব বুলি পৰীক্ষাৰ্থী আৰু অভিভাৱকসকৰ প্ৰতি আহ্বান জনাইছে।
আনহাতে একাংশ অভিভাৱক আৰু সচেতন ৰাইজে এই অপপ্ৰচাৰ চলোৱাসকলৰ বিৰুদ্ধে ব্যৱস্থা লোৱাৰ দাবী জনাইছে।
