মণিপুৰ ৰাজ্য চৰকাৰে প্ৰায় ৯.৪৫ কোটি টকা ব্যয় সাপেক্ষেৰে ৰাজ্যখনত আন্দ্ৰো আৰু পইৰ’খঞ্জিনত নিৰ্মাণ কৰিব দুটা সংখ্যালঘু হোষ্টেল । মঙলবাৰে ৰাজ্যখনৰ বন আৰু পৰিৱেশ মন্ত্ৰী শ্যামকুমাৰে ‘গাঁৱলৈ বলক’ তথা মণিপুৰৰ স্থানীয় ভাষাত ‘খুংগাং চাটছে’ শীৰ্ষক আঁচনিৰ শুভাৰম্ভ কৰি এই কথা ঘোষণা কৰে।
পূব ইম্ফলৰ আন্দ্ৰো বিধানসভা সমষ্টিৰ অন্তৰ্গত য়াম্বেম য়াৰিপকস্থিত য়াম্বেম লেম্পাক কমিউনিটি হলত আয়োজিত উক্ত আঁচনিৰ শুভাৰম্ভণি অনুষ্ঠানত বন আৰু পৰিৱেশ মন্ত্ৰীগৰাকীয়ে কয় যে ৰাজ্যখনৰ দুৰ্গম অঞ্চলৰ গাঁওসমূহক সৰ্বাংগীন উন্নয়ন কৰাৰ লক্ষ্যৰে মুখ্য মন্ত্ৰী বীৰেন সিঙৰ নেতৃত্বত এই আঁচনিখন শুভাৰম্ভ কৰা হৈছে।
তেওঁ লগতে কয় যে ৰাজ্য আৰু কেন্দ্ৰ চৰকাৰে গ্ৰহণ কৰা আঁচনি সমূহে উক্ত অঞ্চল সমূহত যাতে সহজতে ঢুকি পাই তাৰ বাবে সকলো লোককে ইয়াৰ সুবিধা সমূহ গ্ৰহণ কৰিবলৈ পৰামৰ্শ আগবঢ়ায়।
ৰাজ্যখনৰ সৰ্বসাধাৰণ ৰাইজৰ অসুবিধা সমূহ দূৰ কৰা তথা চৰকাৰে গ্ৰহণ কৰা আঁচনি সমূহৰ বিষয়ে সজাগ কৰিবলৈ সকলো বিভাগীয় কৰ্তৃপক্ষকে নিজিৰ নিজৰ দায়িত্ব পালন কৰিবলৈ আহ্বান জনায়।
এই অনুষ্ঠানত উপস্থিত থকা তুলিহাল জিলা পৰিষদৰ সদস্যা কংবাম ইনাওছা দেৱীয়ে ৰাজ্যখনৰ জনসাধাৰণৰ বাবে চৰকাৰে গ্ৰহণ কৰা বিভিন্ন আঁচনিসমূহৰ বিষয়ে উল্লেখ কৰে। ইয়াৰ উপৰি আন্দ্ৰো নগৰ পঞ্চায়তৰ অধ্যক্ষ লুখই সিঙে চৰকাৰী আঁচনি সমূহৰ লাভালাভ গ্ৰহণ কৰাত জনসাধাৰণে সন্মুখীন হৈ অহা বিভিন্ন সমস্যাৱলীৰ বিষয়ে উল্লেখ কৰে।
ইয়াৰ উপৰি চৰকাৰী আঁচনিসমূহৰ লাভা লাভ গ্ৰহণ কৰিবলৈ বিভিন্ন সমস্যা হোৱা হেতুকে চৰকাৰী প্ৰক্ৰিয়া সমূহ কিছু শিথিল কৰিবলৈ সিঙে বিভাগীয় কৰ্তৃপক্ষক অনুৰোধ জনায়।
এই অনুষ্ঠানতে ৰাজ্যখনৰ খেতিয়কসকলৰ মাজত কৃষিজাত সামগ্ৰী, বিদ্যালয় এৰা শিশুসকলৰ মাজত কিতাপ পত্ৰ আদি বিতৰণ কৰাৰ লগতে বন বিভাগৰ উদ্যোগত বিভিন্ন গছপুলি ৰোপন কৰা হয়।
