আজি শ্বহীদ সাংবাদিক পৰাগ কুমাৰ দাসৰ মৃত্যু তিথি। ১৯৯৬ চনৰ আজিৰ দিনটোতে প্ৰাণ হেৰুৱাইছিল নিৰ্ভীক সাংবাদিক গৰাকীয়ে। অচিনাক্ত দুৰ্বৃত্তৰ গুলিত প্ৰাণ হেৰুৱাইছিল সাংবাদিকজনে। আজি ৰাজ্যৰ বিভিন্ন প্ৰান্তত পৰাগ দাসক স্মৰণ কৰি অনুষ্ঠানৰ আয়োজন কৰা হৈছে।
গুৱাহাটীতো আজি মানব অধিকাৰ সংগ্ৰাম সমিতিৰ উদ্যোগত গুৱাহাটী প্ৰেছ ক্লাৱত পৰাগ স্মৰণ আৰু আলোচনা চক্ৰ অনুষ্ঠানৰ আয়োজন কৰা হৈছে।
বুবুমনি গোস্বামীৰ সঞ্চালনাত অনুষ্ঠিত আলোচনা চক্ৰৰ বিষয় হৈছে ‘মানৱ অধিকাৰ আৰু অসমৰ জাতি সত্তাসমুহৰ সমস্যা।‘
এই আলোচনা চক্ৰত উপস্থিত থাকে মাছৰ ভাৰপ্ৰাপ্ত অধ্যক্ষ কেশৱ চন্দ্ৰ চহৰীয়া, অধ্যাপক অপুৰ্ব কুমাৰ বৰুৱা, শিল্পী সূৰ্য দাস, বড়ো উইমেন জাষ্টিছ ফ’ৰামৰ অঞ্জলি দৈমাৰি, অধিবক্তা বিজন মহাজন, সাংবাদিক প্ৰকাশ মহন্ত, আলফাৰ সাধাৰণ সম্পাদক অনুপ চেতিয়া আৰু সাংবাদিক অদীপ কুমাৰ ফুকনকে ধৰি বিশিষ্ট ব্যক্তিসকলে।
মানৱ অধিকাৰ সংগ্ৰাম সমিতিৰ সচিব প্ৰধান গনেশ গোস্বামীয়ে আজিৰ অনুষ্ঠানটোৰ আঁত ধৰে।
আনহাতে, আলোচনা চক্ৰ উদ্বোধন কৰি অধ্যাপক অপূৰ্ব কুমাৰ বৰুৱাই কয়,”পৰাগ কুমাৰ দাসৰ আদৰ্শক ৰাষ্ট্ৰযন্ত্ৰৰ সহায়ত জীয়াই ৰাখিব নোৱাৰি।পৰাগ দাসে এনে বহু কথা যুক্তিৰে বিশ্লেষণ কৰিছিল যিবোৰ ৰাষ্ট্ৰৰ গ্ৰহণযোগ্য নাছিল।‘’
আলোচনা চক্ৰত নিজৰ বক্তব্যত বিজন মহাজনে কয়, “পৰাগ দাসক ৰাষ্ট্ৰযন্ত্ৰই হত্যা কৰিছিল। সেইকাৰণে সুৰুঙা ৰাখি তদন্ত প্ৰক্ৰিয়া চলিছিল। ৰাষ্ট্ৰযন্ত্ৰই হত্যা কৰা বাবেই হত্যাকাৰীক ধৰা পেলাব নোৱাৰিলে।‘’
আন এগৰাকী বক্তা সাংবাদিক প্ৰকাশ মহন্তই পৰাগ দাসৰ বিষয়ে স্মৃতি ৰোমন্থন কৰি কৰি কয় যে “নতুন প্ৰজন্মৰ বহুতেই পৰাগ কুমাৰ দাসৰ বিষয়ে নাজানে, কিন্তু জানিবলৈ তেওঁলোক বহুত আগ্ৰহী।‘’
তেওঁ লগতে নাগৰিকত্ব সংশোধনী বিধেয়কৰ বিৰূদ্ধে নতুন প্ৰজন্ম ওলাই অহাৰ প্ৰসংগ উল্লেখ কৰি তেওঁলোকে যি আন্দোলন কৰিছে সেয়া উশৃংখলতা নহয়, বৰঞ্চ সেয়া সুসংঘবদ্ধভাৱে কেনেকৈ জাতিটোক বচাব পাৰি তাৰ প্ৰয়াস বুলি অভিহিত কৰে।
সাম্প্ৰতিক সময়ত জাতিটোৰ জটিল সন্ধিক্ষনত পৰাগ দাসৰ নিচিনা মানুহৰ প্ৰয়োজন আছে বুলিও তেওঁ মন্তব্য কৰে।
অনুষ্ঠানত অঞ্জলি দৈমাৰীয়ে শোষিত জাতি জনগোষ্ঠীৰ হকে পৰাগ দাসে কিদৰে মাত মাতিছিল সেই বিষয়ে দোহাৰে।
অনুপ চেতিয়াই আলফাৰ সংগ্ৰামখন আগুৱাই নিয়াৰ ক্ষেত্ৰত পৰাগ দাস আৰু মাছৰ কৰ্মীয়ে আগবঢ়োৱা অৱদানৰ কথা উল্লেখ কৰি নিজৰ বক্তব্য আগবঢ়ায়।
