শেহতীয়াভাৱে অনুষ্ঠিত হৈ যোৱা পঞ্চায়ত আৰু গ্ৰামোন্নয়ন বিভাগৰ পৰীক্ষাত হোৱা ব্যাপক খলিমেলিৰ পাছত ৰাজ্যজুৰি প্ৰতিক্ৰিয়া অব্যাহত থকাৰ মাজতে মঙলবাৰে গুৱাহাটীৰ পাঞ্জাবাৰীস্থিত পঞ্চায়ত আৰু গ্ৰামোন্নয়ন সঞ্চালকালয়ৰ সন্মুখত এই পৰীক্ষাত অৱতীৰ্ণ হোৱা শতাধিক পৰীক্ষাৰ্থীয়ে প্ৰতিবাদী কাৰ্যসূচী ৰূপায়ণ কৰে।
উল্লেখযোগ্য যে পঞ্চায়ত আৰু গ্ৰামোন্নয়ন বিভাগৰ কিছুমান পদৰ বাবে যোৱা ২০ মে’ত সমগ্ৰ ৰাজ্যজুৰি অনুষ্ঠিত পৰীক্ষাৰ সময়ছোৱাত ৰাজ্যৰ বহুকেইটা পৰীক্ষা কেন্দ্ৰত পৰীক্ষাৰ্থীয়ে মোবাইল ফোন ব্যৱহাৰ কৰা, ছ’চিয়েল মিডিয়াত প্ৰশ্নকাকত বিয়পি পৰা আৰু সময়ত অ’ এম আৰ ছীট পৰীক্ষাকেন্দ্ৰলৈ নহাকে ধৰি অনেক অনিয়ম হোৱাৰ অভিযোগ উঠিছিল।
কিন্তু যদিও গ্ৰামোন্নয়ন মন্ত্ৰী নৱ কুমাৰ দলেই এইবোৰক ‘সৰু খেলিমেলি’ আৰু সুকলমে পৰীক্ষা অনুষ্ঠিত হোৱা বুলি দাবী কৰিছে, এই লৈ সৰ্বত্ৰে প্ৰতিবাদ অব্যাহত আছে। আনকি মুখ্য মন্ত্ৰীয়েও ইয়াৰ তদন্ত দিয়া বুলি জানিব পৰা গৈছে।
আজি প্ৰতিবাদকাৰীসকলে যোৱা ২০ মে’ত অনুষ্ঠিত পৰীক্ষাটো বাতিল কৰি পুনৰ পৰীক্ষা অনুষ্ঠিত কৰাৰ দাবী উত্থাপন কৰে। পৰীক্ষাত হোৱা এই খেলিমেলিবোৰত ষড়যন্ত্ৰৰ গোন্ধ পোৱা বুলি উল্লেখ কৰি আজি পৰীক্ষাৰ্থীসকলে বিষয়টোৰ চি বি আই তদন্ত দাবীও কৰে।
“বিজেপি চৰকাৰে দুৰ্নীতিৰ বিৰুদ্ধে শূন্য সহনশীল নীতি গ্ৰহণ কৰা বুলি কৈ থাকে, কিন্তু পঞ্চায়ত আৰু গ্ৰামোন্নয়ন বিভাগৰ পৰীক্ষাত যি হ’ল সেয়া এক চৰম দুৰ্নীতি। চৰকাৰে ইয়াৰ তদন্ত কৰক।” এগৰাকী পৰীক্ষাৰ্থীয়ে এইদৰে কয়।
প্ৰতিবাদকাৰীসকলে বিষয়টোৰ উচিত তদন্তৰ দাবী কৰি পঞ্চায়ত আৰু গ্ৰামোন্নয়ন বিভাগৰ সঞ্চালকৰ জৰিয়তে মুখ্য মন্ত্ৰীলৈ এখন স্মাৰকপত্ৰও প্ৰেৰণ কৰে।
ইপিনে, পঞ্চায়ত আৰু গ্ৰামোন্নয়ন বিভাগৰ পৰীক্ষাত হোৱা ব্যাপক আৰাজকতা সন্দৰ্ভত বিভিন্নজনে প্ৰতিক্ৰিয়া ব্যক্ত কৰে। মঙলবাৰে এক সংবাদমেল যোগে গ্ৰামোন্নয়ন মন্ত্ৰী নৱ কুমাৰ দলেক সমালোচনা কৰে অসম প্ৰদেশ কংগ্ৰেছ কমিটিৰ সভাপতি ৰিপুন বৰাই। বৰাই বিভাগীয় মন্ত্ৰীগৰাকীক ব্যৰ্থতা স্বীকাৰ কৰি পদত্যাগৰ দাবী জনায়। লগতে তেওঁ পৰীক্ষাত হোৱা বিসংগতিত মন্ত্ৰী বা বিভাগটোৰ বিষয়াও জড়িত থকাৰ সন্দেহ ব্যক্ত কৰে।
উল্লেখ্য যে এই পৰীক্ষাটো পুনৰ অনুস্থিত কৰাৰ লগতে চি বি আই তদন্ত দাবী কৰিছে প্ৰদেশ কংগ্ৰেছেও।
পৰীক্ষাত হোৱা ব্যাপক খেলিমেলি সন্দৰ্ভত বিৰোধী দলপতি দেৱব্ৰত শইকীয়াই নৰ্থ-ইষ্ট নাওক কয়, “পঞ্চায়ত আৰু গ্ৰামোন্নয়ন বিভাগৰ পৰীক্ষাত ব্যাপক দুৰ্নীতি হৈছে। মুখ্য মন্ত্ৰীয়ে দুৰ্নীতিৰ বিৰুদ্ধে শূন্য সহনশীলতাৰ কথা কয়, গতিকে এই দুৰ্নীতিৰ তদন্ত কৰক।”
একেদৰে অসম গণ পৰিষদৰ বিধায়ক ৰমেন্দ্ৰ নাৰায়ণ কলিতায়ো বিষয়টোৰ উচিত তদন্ত দাবী কৰে। তেওঁ কয়, “পৰীক্ষা অনুষ্ঠিত হৈ থকাৰ সময়তে মোবাইলে মোবাইলে প্ৰশ্ন কাকত বিয়পি যোৱা বুলি আমি খবৰ পাইছো, লগতে পৰীক্ষা চলি থকাৰ মাজতে মোবাইল ফোন ব্যবহাৰ কৰি থকা ফটো প্ৰকাশ পাইছে। ইমানবোৰ প্ৰমাণ থকাৰ পাছতো মন্ত্ৰীয়ে বিষয়টো অস্বীকাৰ কৰিব বিচৰা কথাটো হাস্যকৰ।” তেওঁ পৰীক্ষাটো পুনৰ অনুষ্ঠিত কৰাৰ দাবী কৰে।
বিষয়টো সন্দৰ্ভত চৰকাৰ তথা পঞ্চায়ত আৰু গ্ৰামোন্নয়ন বিভাগক গৰিহণা দিয়ে সদৌ অসম ছাত্ৰ সন্থাৰ সাধাৰণ সম্পাদক লুৰিণজ্যোতি গগৈয়ে। গগৈয়ে কয়, “এয়া চৰকাৰৰ চৰম ব্যৰ্থতা। চৰকাৰে ৰাজ্যৰ লাখ লাখ নিবনুৱা যুৱক-যুৱতীক লৈ হেতালি খেলিব বিচাৰিছে।” তেৱোঁ পৰীক্ষাটো পুনৰ অনুষ্ঠিত কৰাৰ লগতে বিষয়টোৰ তদন্ত কৰি দোষীক শাস্তি প্ৰদানৰ দাবী কৰে।
ইতিমধ্যে সমগ্ৰ ঘটনা সন্দৰ্ভত মুখ্য মন্ত্ৰী সৰ্বানন্দ সোণোৱালে পঞ্চায়ত আৰু গ্ৰামোন্নয়ন বিভাগৰ আয়ুক্ত সচিব ড০ জে বি এক্কাক তদন্তৰ নিৰ্দেশ দিছে যদিও এই পৰ্যন্ত ২০ মে’ত অনুষ্ঠিত পৰীক্ষাটো বাতিল কৰি পুনৰ পৰীক্ষা অনুষ্ঠিত কৰাৰ কোনো সিদ্ধান্ত চৰকাৰে লোৱা নাই।
