বৃহস্পতিবাৰে ঢাকাৰ এখন আদালতে বাংলাদেশৰ প্ৰাক্তন প্ৰধানমন্ত্ৰী তথা বিৰোধী দলৰ নেত্ৰী খালেদা জিয়াক দুৰ্নীতিৰ এক গোচৰত ৫ বছৰৰ বাবে কাৰাদণ্ড ৰায় দিয়ে।
বাংলাদেশ নেশ্যনেলিষ্ট পাৰ্টিৰ নেত্ৰী ৭২ বছৰীয়া খালেদা জিয়াই এই আৱেদনৰ বিৰুদ্ধে পুনৰ আৱেদন কৰাৰ আশা কৰা হৈছে।
এই ৰায়টোৰ পিছতে আদালতৰ বাহিৰত নেত্ৰীগৰাকীৰ হেজাৰ সংখ্যক সমৰ্থকৰ সৈতে আৰক্ষীৰ খণ্ডযুদ্ধ সংঘটিত হয়।
৫নং বিশেষ আদালতৰ ন্যায়াধীশ মহম্মদ আখটাৰুজ্জামানে খালেদা জিয়াক সশ্ৰম কাৰাদণ্ডৰ ৰায়টো প্ৰদান কৰে।
জিয়া অনাথ ন্যাসৰ বাবে ধাৰ্য পুঁজিৰ খেলিমেলিৰ অভিযোগত আন পাঁচগৰাকী ব্যক্তিৰ সৈতে জিয়াক অভিযুক্ত কৰা হৈছিল।
অহা ডিচেম্বৰত অনুষ্ঠিত হ’বলগীয়া সাধাৰণ নিৰ্বাচনৰ আগেয়ে ৰাজনৈতিকভাৱে গুৰুত্বপূৰ্ণ এই গোচৰটোত জিয়াৰ জ্যেষ্ঠ পুত্ৰ তথা তেওঁৰ ৰাজনৈতিক উত্তৰসূৰী তাৰিক ৰহমান আৰু আন চাৰিগৰাকীক ১০ বছৰৰ কাৰদণ্ড বিহা হৈছে।
বিএনপিৰ উপসভাপতি ৰহমানে বিগত ৯ বছৰ ধৰি লণ্ডনত বসবাস কৰি আছে।
১০ বছৰৰ কাৰাদণ্ড বিহা আন চাৰিগৰাকী হৈছে প্ৰাক্তন আইন প্ৰণেতা কাজী ছালিমুল হক, জিয়াৰ প্ৰাক্তন প্ৰধান সচিব কামাল উদ্দিন ছিদ্দিকি, জিয়াৰ ভতিজা মমিনুৰ ৰহমান আৰু ব্যৱসায়ী ছৰিফুদ্দিন আহমেদ।
