বৰপেটা জিলাৰ পাঠশালা টাউনত আত্মসহায়ক গোট বিলাকৰ সামগ্ৰী বিক্ৰীৰ বাবে স্থাপন কৰা বিক্ৰী কেন্দ্ৰটো জৰাজীৰ্ণ অৱস্থাত বন্ধ হৈ পৰি আছে। ২০০৫/০৬ চনতে ‘বজালী হাট’ নামেৰে স্থাপন কৰা উক্ত কেন্দ্ৰটো সংশ্লিষ্ট কৰ্তৃপক্ষৰ অৱহেলাৰ ফলত স্থাপন কালৰে পৰা এইদৰে পৰিত্যক্ত হৈ আছে। প্ৰাপ্ত তথ্য মতে জিলা গ্ৰাম্য উন্নয়ন সংস্থাৰ দ্বাৰা ‘স্বৰ্ণ জয়ন্তী স্বৰোজগাৰ যোজনা’ অধীনত ১১.৭ লাখ টকাৰ উক্ত বিক্ৰী কেন্দ্ৰটো নিৰ্মাণ কৰা হৈছিল যদিও আজিলৈকে ইয়াৰ যথাযথ ব্যৱহাৰ হোৱা দেখা নগ’ল। মন কৰিব লগীয়া যে অঞ্চলটোৰ আত্মসহায়ক গোট বিলাকক নিজৰ নিজৰ সামগ্ৰী সমূহ প্ৰদৰ্শন তথা বিক্ৰী কৰিব পৰাকৈ ষ্টলৰ সৈতে নিৰ্মাণ কৰা কেন্দ্ৰটো বৰ্তমান বন্ধ হৈ পৰি থকাৰ উপৰি মূল গৃহটোৰ সন্মুখত ‘বজালী হাট’ৰ উপৰি বজালী উপ সংম্ণ্ডলৰ লাইব্ৰেৰী আৰু ‘অংগনবাড়ী কেন্দ্ৰ’ নামে দুখনকৈ ফলক লগাই থোৱা আছে। কৰ্তৃপক্ষৰ গাফিলতিৰ ফলত এইদৰে ৰাজহুৱা ধনৰ অপচয় হৈ থকাত স্থানীয় ৰাইজে ক্ষোভ প্ৰকাশ কৰাৰ লগতে কেন্দ্ৰটো কাৰ্যক্ষম কৰি তুলিবলৈ আহ্বান জনায়।
