চলিত মাহতে ভাৰত আৰু বাংলাদেশৰ মাজত সফলতাৰে যুটীয়া সামৰিক অনুশীলন হৈ যোৱাৰ পাছত ভাৰত-ম্যানমাৰৰ মাজতো ২০ নৱেম্বৰৰ পৰা অনুৰূপ যুটীয়া সামৰিক অনুশীলন আৰম্ভ হ’ব। ২০ নৱেম্বৰৰ পৰা ২৫ নৱেম্বৰলৈ এই কাৰ্য্যসূচী মেঘালয়ৰ উমৰৈত অনুষ্ঠিত হ’ব। তাৰ বাবে যাৱতীয় প্ৰস্তুতি ইতিমধ্যে সম্পূৰ্ণ হৈ উঠিছে। এই কথা জানিবলৈ দি প্ৰতিৰক্ষাৰ জনসংযোগ বিষয়া লেফটেনেণ্ট সুনীত নিউটনে কয় যে দুইখন ৰাষ্ট্ৰৰ মাজত যুটীয়া সামৰিক অনুশীলন ভাৰতৰ মাটিত এয়ে প্ৰথম হ’ব। তেওঁ লগতে কয় যে ভাৰত আৰু ম্যানমাৰৰ মাজত হোৱা ৰাষ্ট্ৰসংঘৰ শান্তিৰক্ষা অভিযানৰ অধীনত এইটোৱে প্ৰথম যুটীয়া অনুশীলন।
‘এই দ্বিপাক্ষিক প্ৰশিক্ষণ কাৰ্য্যসূচীৰ উদ্দেশ্য হ’ল ম্যানমাৰৰ প্ৰতিনিধিক ৰাষ্ট্ৰীসংঘৰ পতাকাৰ অধীনত ৰাষ্ট্ৰসংঘৰ শান্তিৰক্ষা অভিযানত অংশ গ্ৰহণৰ বাবে উপযুক্ত কৰি তোলা।‘ কৰ্নেল তথা জনসংযোগ বিষয়াজনে কয়। এই দ্বিপাক্ষিক অনুশীলনটো মেঘালয়ৰ উমৰৈত সেনাৰ ৰে’ড হৰ্ন ডিভিজনৰ দ্বাৰা পৰিচালিত হ’ব। কাৰ্য্যসূচীটোত ম্যানমাৰ সেনাৰ ১৫জন আৰু ভাৰতীয় সেনাৰ ১৬জন বিষয়াই অংশগ্ৰহণ কৰিব। তেওঁলোকে ছদিন ধৰি যুটীয়াভাৱে প্ৰশিক্ষণ প্ৰদান কৰিব। এই কালছোৱাত ৰাষ্ট্ৰসংঘৰ শান্তিৰক্ষা অভিযানত সেৱা আগ বঢ়াবৰ বাবে সদস্য ৰাষ্ট্ৰৰ সেনাদলৰ প্ৰয়োজনীয় কৌশল, দক্ষতা, পদ্ধতি আদি সম্পৰ্কত ম্যানমাৰৰ সামৰিক প্ৰতিনিধিসকলক অৱগত কৰাত গুৰুত্ব দিয়া হ’ব।
