মঙলবাৰে সমগ্ৰ বিশ্বৰ লগতে মণিপুৰৰ ইম্ফলতো উদযাপন কৰা হয় বিশ্ব হোমিওপ্যাথি দিৱস । ৰাজ্যিক আয়ুছ ছ’চাইটি আৰু হোমিওপ্যাথি মেডিকেল এছ’চিয়েশ্যনৰ উদ্যোগত কালি এই দিৱস পালন কৰা হয়।
ইম্ফলৰ লামফেলপাটস্থিত ইণ্ডিয়ান মেডিকেল এছ’চিয়েশ্যনৰ সভাগৃহত আয়োজিত এই দিৱসত ৰাজ্যৰ স্বাস্থ্য আৰু পৰিয়াল কল্যাণ মন্ত্ৰী জয়ন্তকুমাৰ সিং, আয়ুছৰ অতিৰিক্ত সঞ্চালক ডা০ ৱাই লুখই সিং আৰু হোমিওপ্যাথি মেডিকেল এছ’চিয়েশ্যনৰ ডা০ এন বীৰকুমাৰ সিঙ ক্ৰমে মুখ্য অতিথি, কাৰ্যকৰী সভাপতি আৰু সন্মানীয় অতিথি হিচাপে উপস্থিত থাকে।
এই দিৱসৰ লগত সংগতি ৰাখি মন্ত্ৰী জয়ন্তকুমাৰে কয় যে দৃঢ় সংকল্প আৰু সাহসিকতাৰে সকলোৱে বিভিন্ন ক্ষেত্ৰত আগবাঢ়ি যাব লাগিব। তেওঁ লগতে আঁচনি সমূহ সঠিক ৰূপায়ন কৰাৰ ক্ষেত্ৰতো জোৰ প্ৰদান কৰা দেখা যায়।
স্বাস্থ্য বিভাগৰ লগতে আইন বিভাগৰো দায়িত্বত থকা মন্ত্ৰী জয়ন্তকুমাৰে জানিবলৈ দি কয় যে নিজৰ নিজৰ দায়িত্ব আৰু কৰ্তব্য অনুসৰি বিভিন্ন স্তৰৰ বিষয়া আৰু কৰ্মচাৰীসকলক বেলেগ বেলেগ কামৰ দায়িত্ব দিয়া হৈছে।
ইয়াৰ উপৰি তেওঁ সকলো বিষয়া-কৰ্মচাৰীকে ইজনে সিজনৰ লগত সহযোগিতাৰে কাম-কাজ কৰিবলৈ অনুৰোধ জনায়। লগতে স্বাস্থ্য বিভাগৰ উন্নয়নৰ বাবে ব্যৱস্থাৰ কিছু সাল সলনি কৰাৰো পৰামৰ্শ আগবঢ়ায়। আনহাতে এই অনুষ্ঠানতে হোমিওপ্যাথি মেডিকেল এছ’চিয়েশ্যনৰ বিষয়ববীয়াও ভাষণ প্ৰদান কৰে।
উল্লেখ্য যে অনুষ্ঠানৰ পূৰ্বে হোমিওপ্যাথিৰ জনক তথা জাৰ্মানীৰ চিকিৎসক ডাঃ ছেমুৱেল হাহনেমানক সোঁৱৰাৰ লগতে শ্ৰদ্ধাঞ্জলী জ্ঞাপন কৰে। ডাঃ ছেমুৱেলৰ জন্মদিন ১০ এপ্ৰিলৰ দিনটোতে গোটেই বিশ্বতে হোমিওপ্যাথি দিৱস পালন কৰা হয়।
