মণিপুৰৰ বন বিভাগে এটা বন সুৰক্ষা বাহিনী (এফপিএফ) গঠন কৰাৰ বাবে কেন্দ্ৰলৈ প্ৰস্তাৱ প্ৰেৰণ কৰাৰ পৰিকল্পনা কৰিছে। ৰাজ্যখনৰ উত্তৰ-পূৰ্বাঞ্চলৰ গুৰুত্বপূৰ্ণ সীমান্তৰে বন আৰু বন্যপ্ৰাণী সামগ্ৰীৰ অবৈধ চোৰাং বেহাৰ মোকাৱিলা কৰাৰ কাৰণে এই পৰিকল্পনাৰ কথা চিন্তা কৰা হৈছে।
শুকুৰবাৰে ইম্ফলত সংবাদ মাধ্যমৰ আগত এই কথা সদৰি কৰি মণিপুৰৰ বন আৰু পৰিৱেশ বিভাগৰ মন্ত্ৰী থউনাউজম শ্যামকুমাৰে কয় যে ৰাজ্যখনৰ মুখ্যমন্ত্ৰী এন বীৰেণ সিঙৰ সৈতে বিষয়টো আলোচনা কৰা হ’ব।
মন্ত্ৰী শ্যামকুমাৰে লগতে আশা ব্যক্ত কৰে যে ৰাজ্যখনত বন সুৰক্ষা বাহিনী গঠনে অকৰ্তৃত্বশীল তথা অবৈধভাৱে চলি থকা কাঠ আৰু আন বন্য সামগ্ৰীৰ পৰিবহন ৰোধ কৰিবলৈ বিভাগটো সক্ষম হ’ব।
জনসাধাৰণক এনেধৰণৰ অবৈধ চোৰাং ব্যৱসায়ৰ প্ৰতিৰোধত সহায় কৰিবলৈ আহ্বান জনাই তেওঁ কয় যে বিভাগে ইয়াৰ পৰ্যাপ্ত বনকৰ্মীৰ অভাৱৰ প্ৰতি লক্ষ্য ৰাখি ৰাজ্যখনত বন আৰু বন্যপ্ৰাণী সামগ্ৰীৰ অবৈধ চোৰাং বেহা ৰোধ কৰিবলৈ বিভাগে সেনা আৰু অৰ্দ্ধ সামৰিক বাহিনীকে ধৰি সুৰক্ষা বাহিনীৰ পৰা সহায় ল’ব।
তেওঁ লগতে জনায় যে থউবলত থকা ২৬ নং আছাম ৰাইফলছে যোৱা ২৪ জানুৱাৰিত কাঠভৰ্তি ১৬ খন ট্ৰাক জব্দ কৰিছিল। তেওঁ জনায় যে বিভাগে যোৱা ২০১৭ ৰ ১৮ মে’ত ৰাজ্যখনত থকা সেনা আৰু অৰ্দ্ধ সামৰিক বাহিনীকে ধৰি সকলো সুৰক্ষা বাহিনীলৈ সহায় বিচাৰি এখন পত্ৰ প্ৰেৰণ কৰিছিল।
সুৰক্ষা বাহিনীসমূহক বিভাগে ট্ৰেনজিট পাছ বা মেচিন নম্বৰ থকা ৱাটাৰমাৰ্ক নোহোৱা কাঠ কঢ়িওৱা ট্ৰাকসমূহ ধৰি নিকট বন বিভাগৰ কাৰ্যালয়ক গটাই দিবলৈ অনুৰোধ কৰিছিল।
