মন্ত্ৰীসভা সম্প্ৰসাৰণৰ পিছৰ প্ৰতিক্ৰিয়া অব্যাহত আছে অসমৰ বিভিন্ন ঠাইত। মন্ত্ৰীসভাত বিধায়ক প্ৰশান্ত ফুকনক অন্তৰ্ভুক্ত নকৰাৰ প্ৰতিবাদত আজি ডিব্ৰুগড়ত ডিব্ৰুগড় সমষ্টিৰ বিধায়ক প্ৰশান্ত ফুকনৰ সমৰ্থকসকলে বেনাৰ আৰু প্লেকাৰ্ড হাতত লৈ খলিহামাৰিত থকা দলীয় কাৰ্য্যালয়লৈ মৌন সমদল কৰি যায়। তাৰ পিছতে প্ৰতিবাদত অংশগ্ৰহণ কৰা দলীয় কৰ্মীসকলে এখন সভা পাতি ৰাজ্যিক বিজেপিৰ সভাপতি ৰঞ্জিত কুমাৰ দাস আৰু মুখ্য মন্ত্ৰী সৰ্বানন্দ সোণোৱালক প্ৰশান্ত ফুকনৰ বিষয়টো অৱগত কৰাৰ সিদ্ধান্ত লয়।
উল্লেখযোগ্য যে বিধায়ক প্ৰশান্ত ফুকনে নিজেও মন্ত্ৰিত্ব নোপোৱাৰ ক্ষোভত কালি একাধিক দলীয় বিষয়বাবৰ পৰা পদত্যাগ কৰিছিল। তেওঁ তাৎক্ষণিক প্ৰতিক্ৰিয়া হিচাপে অসম মেডিকেল কলেজ এণ্ড হস্পিটেলৰ পৰিচালনা সমিতিৰ অধ্যক্ষ পদৰ পৰাও অব্যাহতি লৈছিল।
“আমি তেওঁক মন্ত্ৰিত্ব নিদিয়াত হতাশ হৈছো। কাৰণ তেওঁ এজন জ্যেষ্ঠ বিধায়ক। ২০০৬ চনৰ পৰা তেওঁ তৃতীয় বাৰৰ বাবে ডিব্ৰুগড় সমষ্টিত জয়ী হৈছে। এইটো তেওঁৰ বাবে ইতিকিঙৰ দৰে হৈছে।” পৰাগ দত্ত নামৰ এজন সমৰ্থকে কয়।
আনহাতে তাৎপৰ্য্যপূৰ্ণভাৱে সমৰ্থকজনে সৰ্বানন্দ সোণোৱাল মন্ত্ৰীসভাত অসমত থকা হিন্দীভাষী সকলৰ প্ৰতিনিধি নথকাটোতো দুখ প্ৰকাশ কৰে। তেওঁ কয়, “অসমত ৩০ লাখ হিন্দীভাষীয়ে বাস কৰে আৰু তেওঁলোকে বিজেপিক ভোট দিছিল। সৰ্বানন্দ সোণোৱাল চৰকাৰত তেওঁলোকৰ প্ৰতিনিধক অন্তৰ্ভুক্ত নকৰাটো ঠিক হোৱা নাই।”
মন কৰিব লগীয়া যে যিসময়ত মন্ত্ৰীসভাখনত অসমৰ থলুৱা জনগোষ্ঠীৰে প্ৰতিনিধিত্ব সঠিক অনুপাতত কৰিব পৰা নাই, সেই সময়ত কাম আৰু উপাৰ্জনৰ বাবে অসমত থকা হিন্দীভাষীৰ প্ৰতিনিধিয়ে স্থান নোপোৱাটোত দুখ প্ৰকাশ কৰিছে বিজেপিৰ অসমীয়া সমৰ্থকে।
আনহাতে ৰাজ্যখনৰ নেপালী সম্প্ৰদায়টোৱেও তেওঁলোকৰ সম্প্ৰদায়ৰ প্ৰতিনিধিক মন্ত্ৰীসভাত অন্তৰ্ভুক্ত নকৰিলে আগন্তুক নিৰ্বাচনবোৰত বিজেপিক বৰ্জন কৰাৰ ভাবুকি দিছে। তেওঁলোকে মাৰ্ঘেৰিটাৰ ভাস্কৰ শৰ্মা আৰু বৰচলাৰ গণেশ কুমাৰ লিম্বৰ মাজৰ কোনোবা এজনক মন্ত্ৰীসভাত অন্তৰ্ভুক্ত কৰাৰ দাবী তুলিছে।
