আজি (২৬ এপ্ৰিল, ২০১৮) সোণোৱাল চৰকাৰৰ মন্ত্ৰীসভাখনৰ বহু আকাংক্ষিত সম্প্ৰসাৰণ বাস্তৱত দেখা যায়। আজি ৭জন নতুন মন্ত্ৰীয়ে শপত লোৱাৰ পিছত মন্ত্ৰীসভাখন সম্প্ৰসাৰণৰ সময় পুনঃ নৱীকৰণ প্ৰক্ৰিয়াটোৰ অন্ত পৰে।
প্ৰশ্ন হয়,- মন্ত্ৰীসভাখন সম্প্ৰসাৰণ নকৰাটো এটা কৌশল আছিল নেকি বা বাৰে বাৰে ইয়াৰ সম্প্ৰসাৰণ কৌশলেৰে পিছুৱাই ৰখা হৈছিল নেকি?
মনলৈ আহিব পৰা কথাটো হ’ল- মন্ত্ৰীসভাখন সম্প্ৰসাৰণ নকৰা বাবেই ড০ হিমন্ত বিশ্ব শৰ্মাৰ দৰে এজন মন্ত্ৰীৰ হাততে বহুকেইটা গুৰুত্বপূৰ্ণ বিভাগ দি ৰাখিব লগীয়া হৈছিল। মন্ত্ৰী শৰ্মাৰ হাতত এতিয়ালৈকে শিক্ষা, স্বাস্থ্য, বিত্ত, পৰিকল্পনা আৰু উন্নয়নৰ দৰে অতি গুৰুত্বপূৰ্ণ কেইবাটাও বিভাগ আছে। নিজৰ হাতত এই গুৰুত্বপূৰ্ণ বিভাগবোৰ যাতে অধিক সময় ৰাখিব পাৰে সেইটোৱেই মন্ত্ৰীসভা সম্প্ৰসাৰণ নকৰাৰ আঁৰৰ কৌশল আছিল নেকি?
পূৰ্বৰ চৰকাৰখনৰ মুৰব্বী তৰুণ গগৈয়ে শেহৰ পাঁচ বছৰত মন্ত্ৰীসভাখন সম্প্ৰসাৰণ কৰিব নোৱাৰিছিল উমি উমি জ্বলি থকা বিসম্বাদৰ জুইকুৰা দপদপাই জ্বলাৰ ভয়ত। কিন্তু সৰ্বাৰ চৰকাৰে কিহৰ ভয়ত কৰিব নোৱাৰিছিল?
উল্লেখযোগ্য যে যোৱা দুবছৰে মাত্ৰ ১১জন মন্ত্ৰীৰে চলি থকা সোণোৱাল মন্ত্ৰীসভাখন সম্প্ৰসাৰণৰ বাবে কেইবাবাৰো সময় নিৰ্ধাৰণ কৰা হৈছিল। কিন্তু মূৰকত সেই সময় পুনৰ নৱীকৰণ কৰা হৈছিল।
যিসময়ত শাসনাধিষ্ঠিত মৰ্চাৰ ৭৬জন বিধায়কে মন্ত্ৰিত্বৰ দায়িত্ব ল’বলৈ আশা আৰু উদ্যমেৰে সাজু হৈ আছিল, সেই সময়ত সৰ্বাধিক ১৯জন মন্ত্ৰীৰ শক্তিযুক্ত মন্ত্ৰীসভাখনক কিয় দুবছৰে নিশকতীয়া কৰি ৰাখিলে মুখ্য মন্ত্ৰী সোণোৱাল তথা বিজেপি নেতৃত্বই? নিশকতীয়া মন্ত্ৰীসভাই দেখুৱাব পৰা দুৰ্বল পাৰদৰ্শিতাৰ পৰা ৰাইজৰো লোকচান হোৱা নাইনে? এজন মন্ত্ৰীয়ে পাঁচবছৰ সময়ত যিমান কাম কৰিব পাৰে, তিনি বছৰত তিমান কাম সম্ভৱ হ’বনে? পৰিৱৰ্তনৰ কথা কৈ থকা, কৰ্ম-সংস্কৃতিৰ কথা কৈ থকা চৰকাৰৰ এই বিপৰীত স্থিতি কিয়?
পূৰ্বে কংগ্ৰেছী মুখ্য মন্ত্ৰী তৰুণ গগৈয়ে ছোনিয়া গান্ধীৰ (তদানীন্তন কংগ্ৰেছ অধ্যক্ষা) অনুমতি নোপোৱা বাবেই মন্ত্ৰীসভাখন সম্প্ৰসাৰণ কৰিব পৰা নাই বুলি সমালোচনা উঠিছিল।
এতিয়াও সৰ্বানন্দ সোণোৱালে আৰ এছ এছৰ অনুমোদন নোপোৱা বাবে মন্ত্ৰীসভাৰ সম্প্ৰসাৰণ কৰিব নোৱৰা অভিযোগটো সঁচা নেকি? যদি সেয়ে হয়, আৰ এছ এছৰ হাতৰ পুতলাত পৰিণত হোৱা চৰকাৰ এখনে অসমৰ ৰাইজৰ সেইবোৰ স্বাৰ্থত নিজৰ মাত দিব পাৰিব নে, যিবোৰ স্বাৰ্থৰ সৈতে গেৰুৱাৰঙী ভাৰত ৰাষ্ট্ৰৰ স্বাৰ্থৰ অগ্ৰাধিকাৰৰ প্ৰশ্নটো থাকিব? উদাহৰণস্বৰূপে, তেতিয়া হ’লে নাগৰিকত্ব সংশোধনী বিধেয়ক, ২০১৬ৰ প্ৰশ্নটোত আৰ এছ এছৰ শ্ৰুতলিপিয়েই অসম চৰকাৰৰ স্থিতি নিৰ্ণয় কৰাটো নিশ্চিত।
