যোৱা তিনি-চাৰি মাহত ৰাজ্যখনৰ বিভিন্ন ঠাইত মানুহৰ হাতত কৰুণ মৃত্যুক সাৱটি ল’ব লগীয়া হৈছে বহুকেইটা নাহৰফুটুকী বাঘে। আনহাতে এই সময়ছোৱাৰ ভিতৰত ১৫-২০টা বাঘ পিঞ্জৰাবদ্ধ হৈছে। বন বিভাগৰ দায়িত্ববাহী বিষয়াৰ পৰা বা কোনো তথাকথিত প্ৰকৃতি প্ৰেমী সংগঠনৰ পৰা এই সন্দৰ্ভত কোনো মত প্ৰকাশ কৰা দেখা যোৱা নাই।
এই সম্পৰ্কত আমাৰ হাতত থকা কেইটামান তথ্য এনে ধৰণৰ-
(১) ৭ নৱেম্বৰ, ২০১৭
মৰিয়নিৰ কাটনিবাৰী বাগিচাত পিঞ্জৰাবদ্ধ হয় এটা প্ৰকাণ্ড নাহৰফুটুকী।
(২) ১৭ নৱেম্বৰ, ২০১৭
গুৱাহাটী মহানগৰীৰ পাৰ্শ্বৱৰ্তী অঞ্চল ধীৰেনপাৰাত চাৰিজন লোকক নাহৰফুটুকীৰ আক্ৰমণ।
(৩) ১৮ নৱেম্বৰ, ২০১৭
শিৱসাগৰ জিলাৰ নামতিৰ সমীপৰ মেজেঙাত বন বিভাগৰ পিঞ্জৰাত আবদ্ধ হয় এটা প্ৰকাণ্ড নাহৰফুটুকী।
(৪) ১ ডিচেম্বৰ, ২০১৭
নাহৰকটীয়াৰ জয়পুৰত এটা নাহৰফুটুকীক হত্যা কৰি তাৰ মাংস ভক্ষণ কৰে স্থানীয় লোকে।
(৫) ১৩ ডিচেম্বৰ,
গুৱাহাটী মহানগৰীৰ বৰাগাঁৱৰ বামুণপাৰাত ৰাতি খাদ্যৰ সন্ধানত অহা এটা নাহৰফুটুকী কুঁৱাত সোমাই পৰে।
(৬) ১৯ ডিচেম্বৰ
মাৰ্ঘেৰিটাত গাড়ীয়ে চেপি মাৰে এটা নাহৰফুটুকীক।
(৭) ১২ জানুৱাৰি, ২০১৮
নাহৰকটীয়াৰ চাচনীত পিঞ্জৰাবদ্ধ হয় এটা নাহৰফুটুকী।
(৮) ১১ ফেব্ৰুৱাৰি, ২০১৮
নাহৰকটীয়াৰ মেৰবিলত ৰাইজে পতা পিঞ্জৰাত আবদ্ধ এটা নাহৰফুটুকী।
(৯) ১৬ ফেব্ৰুৱাৰি, ২০১৮
দেৰগাৱঁৰ কুৰালগুৰিত পিঞ্জৰাবদ্ধ এটা নাহৰফুটুকী।
(১০) ১৭ ফেব্ৰুৱাৰি, ২০১৮
ডিগবৈত নাহৰফুটুকীৰ আক্ৰমণত এজন কিশোৰ আহত
(১১) ১৮ ফেব্ৰুৱাৰি, ২০১৮
যোৰাহাটৰ উজনি গায়ন গাৱঁত উত্তেজিত লোকে মৰিয়াই মৰিয়াই নৃশংসভাৱে হত্যা কৰে এটা নাহৰফুটুকী বাঘক, য’ত বন বিভাগৰ লোককো সহযোগ কৰা দেখা যায়।
(১২) ২২ ফেব্ৰুৱাৰি, ২০১৮
দেৰগাওঁ শিঙৰাজানত পিঞ্জৰাবদ্ধ এটা নাহৰফুটুকী বাঘ।
(১৩) ৭ মাৰ্চ, ২০১৮ বোকাখাতৰ লখৌজান চাহ বাগিচাত নাহৰফুটুকী বাঘৰ আক্ৰমণত এজন আহত।
(১৪) ১৪ মাৰ্চ, ২০১৮
বোকাখাতৰ শ্বহীদ কমলা মিৰি চিকিৎসালয় চৌহদৰ মানুহৰ কুকুৰাৰ গঁড়ালত সোমাই থকা অৱস্থাত স্থানীয় লোক আৰু বন বিভাগে ধৰে এটা নাহৰফুটুকী বাঘ।
(১৫) মাৰ্চ ১৬, ২০১৮
নুমলীগড়ত শোধনাগাৰৰ নগৰাঞ্চলত পিঞ্জৰাবদ্ধ এটা প্ৰকাণ্ড নাহৰফুটুকী বাঘ।
–এয়া আমাৰ হাতত থকা তথ্য। ইয়াৰ বাহিৰতো আছে নাহৰফুটুকী বাঘৰ সৈতে মানুহৰ সংঘাতৰ ঘটনা। এনেকুৱা হাৰত নাহৰফুটুকী বাঘৰ মৃত্যু বা জনাঞ্চলত প্ৰৱেশৰ ঘটনা এক ব্যতিক্ৰম তথা উদ্বেগৰ বিষয়। প্ৰশ্ন হয়- বাঘবোৰ জনাঞ্চললৈ ওলাই আহিবলৈ বাধ্য হৈছে কিয়? খাদ্যৰ অভাৱত পৰিছে নেকি বাঘবোৰ?
এটা বাঘক দৈনিক প্ৰয়োজনীয় পৰিমাণৰ খাদ্য হাবিত নোহোৱা হৈছে নেকি? যাৰ বাবেই মানুহৰ পশুধন কাঢ়ি কৰি খাব লগীয়া হৈছে।
তাৰোপৰি প্ৰশ্ন হয়- আমাৰ সাধাৰণ মানুহ বন্যপ্ৰাণীৰ প্ৰতি সামান্যও সহানুভূতিশীল তথা দায়িত্বশীল হয় নে? এই বাঘ-মানুহৰ সংঘাত ৰোধ তথা মানুহৰ নৃশংসতাৰ পৰা বাঘবোৰক বচোৱাৰ বাবে বন বিভাগৰ দায়িত্ব নাই নেকি?
যোৰহাটৰ উজনি গায়ন গাৱঁত এটা নাহৰফুটুকী বাঘক নৃশংসভাৱে হত্যা কৰা দৃশ্য সম্বলিত ভিডিঅ’টো দেখি ক’বৰ মন যায় মানুহৰ নৃশংসতাৰ কোনো তুলনা নাই। বাঘটোৰ মৃত্যু বা মৃত্যুৰ ওচৰত আত্মসমৰ্পণেও উন্মত্ত মানুহবোৰক শান্ত কৰিব পৰা নাছিল। তেতিয়াও সন্তুষ্ট নোহোৱা মানুহবোৰে মৃতদেহটোৰ ওপৰতে উপৰ্যুপৰি কোবাই আছিল। ধিক্কাৰৰ কথা যে বন বিভাগৰ লোকৰো সহযোগিতা দেখা গ’ল নাহৰফুটুকীটোৰ হত্যাত।
উল্লেখযোগ্য যে নাহৰফুটুকী বাঘক ভাৰতীয় বন্যপ্ৰাণী সুৰক্ষা আইন, ১৯৭২ৰ প্ৰথম সূচীৰ অধীনত সংৰক্ষিত প্ৰাণী হিচাপে ৰখা হৈছে।
