মিজোৰামৰ যুৱ আয়োগক অধিক শক্তিশালী কৰাৰ স্বাৰ্থতে বুধবাৰে মুখ্য মন্ত্ৰী লাল থানহাওলাই আয়োগৰ অধ্যক্ষ যোছেফ লাহলিমপুইৱাক ১২০ লাখ টকাৰ চেক আগবঢ়ায়।
বুধবাৰে আইজলত অনুষ্ঠিত এখন বৈঠকত মুখ্য মন্ত্ৰী লাল থানহাওলাই আয়োগক এই পুঁজি মুকলি কৰি দিয়া অনুষ্ঠানটোত বহুকেইগৰাকী চৰকাৰী বিষয়াৰ লগতে ভালেসংখ্যক লোক উপস্থিত আছিল।উল্লেখযোগ্য যে মিজোৰাম যুৱ আয়োগে হাতত লোৱা পৰিকল্পনা অনুসৰি ৰাজ্যখনৰ যুৱক- যুৱতীসকলক অসামৰিক সেৱাৰ পৰীক্ষাৰ বাবে সাজু কৰাৰ উদ্দেশ্যে উক্ত পুঁজি খৰচ কৰা হ’ব।
বৈঠকখনত মিজোৰাম যুৱ আয়োগৰ অধ্যক্ষগৰাকীয়ে ইউপিএছচি, আইআইটি- জেইই আৰু নীট পৰীক্ষাৰ পৰীক্ষাৰ্থীৰ বাবে বাবে তুলনামূলকভাৱে কম খৰচী প্ৰশিক্ষণৰ কাৰ্যসূচী হাতত লোৱা সন্দৰ্ভত বাখ্যা আগবঢ়ায়।
ইয়াৰ মাজতে আয়োগৰ নতুন সদস্য সকলে বিভিন্ন প্ৰকল্প সন্দৰ্ভত তেওঁলোকৰ উপলব্ধিৰ বিষয়ে উপস্থিত সকলক অৱগত কৰে।
আনহাতে বৈঠকখনত অহা ১৪ জুলাইৰ পৰা একাদশ (বিজ্ঞান) শ্ৰেনীৰ বাবে লুংলেই আৰু আইজলত তথা ২১ জুলাইৰ পৰা অনুষ্ঠিত হ’বলগীয়া আইএএছ প্ৰশিক্ষণ কাৰ্যসূচীৰ বিষয়েও বিতংভাৱে আলোচনা কৰা হয়।
