অসম সাহিত্য সভাৰ আগন্তুক অধিবেশনক লৈ চলি থকা সকলো জল্পনা কল্পনাৰ মাজতে সাহিত্য সভাৰ তৰফৰ পৰা এই কথা জনোৱা হৈছে যে অসম সাহিত্য সভাৰ ৭৪ সংখ্যক বুঢ়ীদিহিং-বৰডুমচা অধিবেশনৰ লাইখুঁটা অহা ৬ ডিচেম্বৰত স্থাপন কৰিব মুখ্যমন্ত্ৰী সৰ্বানন্দ সোনোৱালে। কাৰ্যসুচী অনুসৰি ৰাতিপুৱা ৯ বজাত পতাকা উত্তোলন কৰিব তিনিচুকীয়া জিলা সাহিত্য সভাৰ সভাপতি প্ৰবীণ বৰাই । বুঢ়ীদিহিং শাখা সাহিত্য সভাৰ প্ৰতিষ্ঠাপক সভাপতি বসন্ত কুমাৰ দেউৰীয়ে কৰিবলগীয়া স্মৃতি তৰ্পন অনুষ্ঠানৰ পিছতেই এক মাংগলিক অনুষ্ঠানৰ মাজেৰে লাইখুঁটা স্থাপন কৰিব মুখ্যমন্ত্ৰী সৰ্বানন্দ সোনোৱালে। আদৰণী সমিতিৰ সভাপতি তথা সাংসদ ৰামেশ্বৰ তেলীৰ সভাপতিত্বত অনুষ্ঠিত হ’বলগীয়া মুকলি সভাত বিশিষ্ঠ অতিথি হিচাপে উপস্থিত থাকিব অসম সাহিত্য সভাৰ উপ-সভাপতি প্ৰহ্লাদ চন্দ্ৰ তাচা, সন্মানীয় অতিথি হিচাপে উপস্থিত থাকিব জলসম্পদ মন্ত্ৰী কেশৱ মহন্ত, অৰুণাচলৰ প্ৰাক্তন যোগান মন্ত্ৰী চি. চি. চিংফৌ। ৰিতু পথাৰৰ বদৌচা সমন্বয় ক্ষেত্ৰত এই লৈ উৎসাহ বৃদ্ধি পাইছে। আনহাতে, আগন্তুক বৰডুমচা অধিবেশনৰ বাবে সভপতি নিৰ্বাচনৰ প্ৰক্ৰিয়াও সমান্তৰালভাৱে চলি আছে। বহু বিতৰ্কৰ মাজেৰে পাৰ হৈ অহা অসম সাহিত্য সভাৰ প্ৰতি অসমীয়া ৰাইজৰ হেপাহ এতিয়াও আগৰ দৰে বৰ্তি আছে যদিও মাজে সময়ে সৃষ্টি হৈ অহা বিতৰ্কৰ বাবে সাহিত্য সভাৰ প্ৰতি একাংশ বিদ্বৎ সমাজৰ মোহভংগ হোৱা বুলি বহুতেই অভিযোগ আনে। অৱশ্যে সাধাৰণ অসমীয়া ৰাইজে এতিয়াও অসম সাহিত্য সভাক নিজৰ অনুষ্ঠান হিচাপে আদৰি লয় বুলি মন্তৱ্য কৰে তিনিচুকীয়াৰ এগৰাকী সাহিত্য অনুৰাগী ত্ৰিদিপ ডেকাই।
