অসমৰ অন্যতম ব্যতিক্ৰমধৰ্মী অকণি সকলৰ বাবে উৎসৰ্গিত সামাজিক-সাংস্কৃতিক অনুষ্ঠান ‘অকণি কবিতা ঘৰ’ অসমৰ কেন্দ্ৰীয় সমিতিয়ে চলিত বৰ্ষটো ৰূপালী জয়ন্তী বৰ্ষৰূপে পালন কৰি থকাৰ পৰিপ্ৰেক্ষিতত বটদ্ৰৱা বিধান সভা সমষ্টিৰ অন্তৰ্গত তথা মৰিগাঁও জিলাৰ বামুণবড়ি গাঁৱত আয়োজন কৰে ‘অকণিৰ মিলন মেলা আৰু পৰ্যালোচনা সভা’শীৰ্ষক এক ব্যতিক্ৰমী অনুষ্ঠানৰ।
নৱম শ্ৰেণীত অধ্যয়নৰত অকণি প্ৰস্তুতি দাসৰ সভাপতিত্বত অনুষ্ঠিত এই সভাখনত মুখ্য বক্তা ৰূপে অংশ লৈ বামুণবড়ি গাঁৱৰ চিত্ৰশিল্পী অকণি দৰ্শনা দেৱীয়ে প্ৰদান কৰে এক সাৱলীল মানৱতাবাদী ভাষণ।
অসমৰ ভিতৰতে বোধ কৰো প্ৰথম চিত্ৰকৰ্মৰ একক সংগ্ৰহালয় ‘দৰ্শনা চিত্ৰকলা কানন’প্ৰতিষ্ঠা কৰি অকণি সকলৰ বাবে অনুপ্ৰেৰণাৰ বাট মুকলি কৰি দিয়া দৰ্শনাই দিয়া ভাষণত শিশুৰ বিকাশ সাধনত পিতৃ-মাতৃৰ ভূমিকা সন্দৰ্ভত মন্তব্য আগবঢ়ায়। লগতে গ্ৰামাঞ্চলৰ দৰিদ্ৰ শিশুসকলক বাতৰি কাকত পঢ়াৰ সুবিধা কৰি দিবলৈ উপস্থিত ৰাইজক আহ্বান জনায়।
এই সভাত উপস্থিত থাকি পুথি অধ্যয়নৰ প্ৰয়োজনীয়তাৰ ওপৰত এটি সুন্দৰ ভাষণ আগবঢ়ায় চতুৰ্থ শ্ৰেণীৰ তনুশ্ৰী ডেকাই। লগতে অকণি বক্তাৰূপে সভাখনত অংশ লৈ চতুৰ্থ শ্ৰেণীৰ কৃষ্টিবন ডেকা আৰু প্ৰথম শ্ৰেণীৰ আস্থানন্দিনী মুদৈয়ে ক্ৰমে পলিথিন বৰ্জন আৰু ‘মা’ সম্পৰ্কে দিয়া ভাষণে উপস্থিত ৰাইজক মন্ত্ৰমুগ্ধ কৰি তোলে।
উক্ত অনুষ্ঠানটিত উপস্থিত থাকি ৰহা উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ কমল চন্দ্ৰ শৰ্মা, অৱসৰপ্ৰাপ্ত শিক্ষক সুৰকান্ত বৰা, অকণি কবিতা ঘৰ, অসমৰ প্ৰধান পৰিচালক অৱনী কুমাৰ শইকীয়া, সম্পাদক ৰন্টু মুদৈয়ে বহু মূলীয়া বক্তব্য ৰাখে। অকণি কবিতা ঘৰৰ উদ্যোগত ৰূপায়িত এই ব্যতিক্ৰমী অনুষ্ঠানটিক স্থানীয় লোকসকলে ভূয়সী প্ৰশংসা কৰিছে।
