নাগৰিকত্ব আইন সংশোধনী বিধেয়ক ২০১৬’ বাতিলৰ দাবীত বুধবাৰে অসম জাতীয়তাবাদী যুৱ ছাত্র পৰিষদৰ নেতৃত্বত শতাধিক দল-সংগঠনৰ পাঁচ সহস্রাধিক সমৰ্থকে গণ প্রতিবাদেৰে যোৰহাট নগৰ উত্তাল কৰি তোলে।
অসমীয়া জাতীয় অস্তিত্বৰ প্রতি সৃষ্টি হোৱা ভাবুকিৰ সময়তে স্বাভাৱিকভাৱে ৰাজপথলৈ ওলাই অহা জনতাৰ এই প্রতিবাদে অসমীয়া জাতীয় সংগ্ৰামৰ প্ৰতি থকা দায়বদ্ধতাকে প্রমাণ কৰে। জাতীয় অস্তিত্ব ৰক্ষাৰ বাবে অসমীয়াৰ ঐক্যবদ্ধ সংগ্রামৰ অনুৰণন যোৰহাটত পুনৰ দেখা পোৱা গ’ল।
প্রতিবাদী বিশাল গণ সমদলটো যোৰহাটৰ বিষ্টুৰাম বৰুৱা হল প্রাংগণৰ পৰা আৰম্ভ হৈ এ টি ৰ’ড, গড়আলি, কে বি ৰ’ড হৈ জগন্নাথ বৰুৱা মহাবিদ্যালয়ৰ সন্মুখেৰে আহি উপায়ুক্ত কার্যালয়ৰ সন্মুখত উপস্থিত হয়।
উপায়ুক্তৰ যোগেদি প্ৰতিবাদকাৰী সমদলৰ নেতাসকলে যুটীয়া সংসদীয় সমিতিলৈ স্মাৰকপত্র প্রেৰণ কৰি নাগৰিকত্ব আইন সংশোধনী বিধেয়ক বাতিলৰ দাবী জনায়।
বুধবাৰে লগতে আন পোন্ধৰটাতকৈয়ো অধিক দল-সংগঠন তথা অনুষ্ঠান-প্রতিষ্ঠানে বিতৰ্কিত বিধেয়কখন বাতিলৰ দাবীত উপায়ুক্তৰ যোগেদি যুটীয়া সংসদীয় সমিতিলৈ সুকীয়াকৈ স্মাৰক পত্র প্রেৰণ কৰে।
আনহাতে, উপায়ুক্ত কার্যালয়ৰ সন্মুখতে কার্যসূচীত অংশ গ্রহণ কৰা যুৱ ছাত্র পৰিষদৰ সাধাৰণ সম্পাদক পলাশ চাংমাই, অসম আন্দোলনৰ নেতা সমীৰণ বৰদলৈ, যোৰহাট প্রেছ ক্লাবৰ সভাপতি নিৰঞ্জন মহন্তই প্রতিবাদকাৰীসকলৰ উদ্দেশ্যে বক্তব্য আগবঢ়াই অসমীয়া জাতিৰ অস্তিত্ব ৰক্ষাৰ স্বার্থত ঐক্যবদ্ধভাৱে সংগ্রাম চলাই যোৱাৰ সংকল্প গ্ৰহণ কৰিবলৈ আহবান জনায়।
অসম জাতীয়তাবাদী যুৱ ছাত্র পৰিষদৰ যোৰহাট জিলা সমিতিৰ নেতৃত্বত আছু, কৃষক মুক্তি সংগ্রাম সমিতি, অসম গণ পৰিষদ, অসম সাহিত্য সভা, টাই আহোম ছাত্র সন্থা, আটছা, চুতীয়া ছাত্র সন্থা, চুতীয়া যুৱ সন্মিলন, শ্রীমন্ত শংকৰদেৱ সংঘ, অনুসূচিত জাতি ছাত্র সন্থা, কোঁচ ৰাজবংশী ছাত্র সন্থা, আদিবাসী ছাত্র সন্থা, কলিতা জনগোষ্ঠী, বীৰ লাচিত সেনা, আমছু, যোৰহাট প্রেছ ক্লাব, সদৌ অসম কবি সন্মিলন, কলেজ শিক্ষক সন্থা, মাৰোৱাৰী যুৱ মঞ্চ, মাৰোৱাৰী সন্মিলন, গুৰুদ্বাৰ, হিন্দুস্থানী নৱ যুৱ সমাজ, হিন্দুস্থানী পঞ্চায়তী ঠাকুৰবাৰী সন্মিলন, অখিল অসম কালোৱাৰ সমাজ, চেম্বার্চ অব্ কমার্চ, গোর্খা সন্মিলন আদিৰ লগতে যোৰহাটৰ সকলো মটৰ পৰিবহণ সন্থাকে ধৰি জাতীয় দল- সংগঠনৰ পাঁচ সহস্রাধিক লোকে নাগৰিকত্ব আইন সংশোধনী বিধেয়কখন বাতিলৰ দাবীত প্ৰতিবাদী কাৰ্যসূচীত অংশগ্ৰহণ কৰে।
যুৱ ছাত্ৰ পৰিষদৰ কেন্দ্রীয় সভাপতি পুতুল দত্ত, সাধাৰণ সম্পাদক পলাশ চাংমাই, উপদেষ্টা নলিনী ৰঞ্জন বৰুৱা, সহকাৰী সম্পাদক জিতুল ৰাজখোৱা, বিত্ত সম্পাদক শিৱ কলিতা, প্রচাৰ সম্পাদক মুনিন্দ্র ভূঞা, আছুৰ কেন্দ্রীয় সাংগঠনিক সম্পাদক জুল খাওন্দ, টাই আহোম ছাত্র সন্থাৰ কেন্দ্রীয় কার্যকৰী সভাপতি কুমুদ গগৈ, জিলা সভাপতি ৰাজীৱ গগৈ, আটছাৰ সহকাৰী সম্পাদক ধীৰাজ গোৱালা, চুতীয়া জাতি ছাত্র সন্থাৰ ৰাজ বাঢ়ৈ বৰা, চুতীয়া যুৱ সন্মিলনৰ শ্যামল বৰা, সদৌ অসম কর্মচাৰী পৰিষদৰ প্রাক্তন সভাপতি প্রদীপ বৰাকে ধৰি বিভিন্ন দল-সংগঠনৰ নেতাসকলে বিধেয়কখন বাতিলৰ দাবী তুলি নিজৰ বক্তব্য আগবঢ়ায়।
