গুৱাহাটীৰ ভাৰতীয় প্ৰযুক্তিবিদ্যা প্ৰতিষ্ঠান (IITG) আৰু মেঘালয় বিজ্ঞান আৰু প্ৰযুক্তিবিদ্যা বিশ্ববিদ্যালয়ে (USTM) শৈক্ষিক উন্নয়ন, গৱেষণা, অধ্যয়ন আৰু আন্তঃগাথঁনি তথা প্ৰশাসনিক ক্ষেত্ৰত যৌথভাৱে কাম কৰি যাবলৈ এখন বুজাবুজিৰ চুক্তিত স্বাক্ষৰ কৰিছে।
দুয়োটা অনুষ্ঠানৰ মাজত সম্পন্ন হোৱা এই চুক্তি অনুসৰি আই আই টি, গুৱাহাটীয়ে মেঘালয় বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ শিক্ষকগোটৰ প্ৰতি সমৰ্থন আগ বঢ়াব।
আই আই টি, গুৱাহাটীৰ অধ্যাপক বিশ্বাসে প্ৰকাশ কৰিছে যে এই চুক্তিখন সামজিক আৰু প্ৰধানকৈ সম্প্ৰসাৰণমূলক শৈক্ষিক কাৰ্য্যসূচীসমূহৰ মাজেৰে আগশাৰীৰ এটা প্ৰতিষ্ঠানক অসম আৰু ইয়াৰ চুবুৰীয়া ৰাজ্যসমূহৰ সৈতে যুক্ত কৰাৰ ক্ষেত্ৰত এটা ভাল পদক্ষেপ।
অধ্যাপক বিশ্বাসে লগতে কয় যে শৈক্ষিক ভূমিকা আৰু নীতিগত দিশত সমাজত প্ৰয়োজনীয় প্ৰক্ৰিয়াত সহায় কৰিবলৈ পাই তেওঁলোক আনন্দিত।
গুৱাহাটী আই আই টিৰ নিৰ্দিষ্ট শিক্ষকসকলে মেঘালয় বিজ্ঞান আৰু প্ৰযুক্তিবিদ্যা বিশ্ববিদ্যালয়ে নিৰ্ধাৰিত পাঠ্যক্ৰম আৰু পাঠ্য বিষয়ৰ শ্ৰেণীত উপস্থিত থাকিব। পৰিকল্পনা অনুসৰি আই আই টি, গুৱাহাটীয়ে মেঘালয় বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ বিভিন্ন বিভাগৰ নিৰ্বাচিত ছাত্ৰ-ছাত্ৰীসকলক ১০-১৫ দিনৰ বাবে বিশেষ শ্ৰেণীসমূহত বা আই আই টি গুৱাহাটীৰ শ্ৰেণীকোঠা আৰু গৱেষণাগাৰত নিয়মীয়া ছাত্ৰ-ছাত্ৰীসকলৰ সৈতে নিৰ্দিষ্ট বিষয়সমূহৰ পাঠগ্ৰহণ কৰাৰ সুবিধা প্ৰদান কৰিব।
লগতে বিশ্ববিদ্যালয়খনৰ নিৰ্বাচিত অন্তিম বৰ্ষৰ কিছুসংখ্যক ছাত্ৰ-ছাত্ৰীয়ে তেওঁলোকৰ প্ৰকল্পৰ কৰ্মশালাসমূহ আই আই টি গুৱাহাটীত সম্পন্ন কৰিব পাৰিব। ইয়াৰ উপৰি মেঘালয় বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ কেইগৰাকীমান নিৰ্বাচিত শিক্ষকক তেওঁলোকৰ বিত্তীয় সাহাৰ্য্যৰ বাবে প্ৰকল্প প্ৰস্তাৱৰ সহ-অনুসন্ধানকাৰী হিচাপে জড়িত কৰাব। লগতে দুয়োটা প্ৰতিষ্ঠানৰে বিভিন্ন বিভাগসমূহে নিৰ্বাচিত আলোচনাচক্ৰ, কৰ্মশালা, বিশেষজ্ঞ পৰ্য্যায়ৰ আলোচনা আদিৰ আয়োজন কৰিব।
তাৰোপৰি, গুৱাহাটী আই আই টিয়ে পৰীক্ষা পতা, নামভৰ্তি, ষ্টাফ নিযুক্তি আৰু সমাৱৰ্তন আদিৰ ক্ষেত্ৰত মেঘালয় বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ ষ্টাফক দিহা-পৰামৰ্শ প্ৰদান কৰিব। আনহাতে গৱেষণাগাৰ, সা-সঁজুলি, পুথিভঁড়াল, শ্ৰেণীকোঠা, ক্ৰীড়া সা-সুবিধা, আৱাস, চৌহদ ব্যৱস্থাপনা আদি আন্তঃগাঁথনিসমূহ উন্নীতকৰণৰ ক্ষেত্ৰতো বিশ্ববিদ্যালয়খনক দিহা দিব।
