পশ্চিম কাৰ্বি আংলং জিলাৰ বৈঠালাংছ’ থানাৰ অন্তৰ্গত লংয়েপীত দেওবাৰে এগৰাকী মহিলাৰ মৃতদেহ উদ্ধাৰ হোৱাৰ ঠিক ২৪ ঘণ্টাৰ ভিতৰতে আজি হত্যাকাৰীজনক ৰাইজৰ সহযোগত আৰক্ষীয়ে আটক কৰিবলৈ সক্ষম হয়।
জানিব পৰা মতে হনছিং ৰংফাৰ নামৰ এজন ২০ বছৰীয়া যুৱকে আৰ্লিছ তেৰণপী নামৰ মহিলাগৰাকীক প্ৰথমে ধৰ্ষণ আৰু তাৰ পাছতে চোকা অস্ত্ৰ দাৰে ঘপিয়াই নৃশংসভাৱে হত্যা কৰে। আৰক্ষীৰ জেৰাত এই চাঞ্চল্যকৰ স্বীকাৰোক্তি প্ৰদান কৰে অভিযুক্ত হনছিং ৰংফাৰে।
উল্লেখযোগ্য যে যোৱা ১৩ জুলাই অৰ্থাৎ শুকুৰবাৰে প্ৰধান মন্ত্ৰী নৰেন্দ্ৰ মোদী আৰু আত্মসহায়ক গোটৰ মাজত হোৱা ভিডিঅ’ কনফাৰেন্স উপভোগ কৰি ঘৰলৈ আহি থকাৰ সময়তে আটকাধীন পাষণ্ডটোৱে দুৰ্গম পাহাৰৰ সুবিধা লৈ সংঘটিত কৰিছিল এই নাৰকীয় ঘটনা। আৰু তাৰ পাছৰে পৰা সন্ধানহীন হৈ থকা মহিলাগৰাকীৰ মৃতদেহ অৱশেষত দেওবাৰে ক্ষত বিক্ষত অৱস্থাত লংয়েপী গাঁৱৰ পৰা কিছু নিলগত উদ্ধাৰ হয়।
মন কৰিবলগীয়া যে মৃত মহিলাগৰাকীক বলাৎকাৰ কৰি হত্যা কৰাৰ সন্দেহত স্থানীয় ৰাইজে হনছিং ৰংফাৰ নামৰ যুৱকজনক আটক কৰি আৰক্ষীক গতাই দিছিল। আৰু আৰক্ষীয়ে যুৱকজনক জেৰা চলোৱাত সমস্ত দোষ স্বীকাৰ কৰে। আৰু সেই লৈ এতিয়া অঞ্চলটোত সৃষ্টি হৈছে তীব্ৰ চাঞ্চল্য।
সেয়া যি নহওক মৃতদেহ উদ্ধাৰৰ ২৪ ঘণ্টাৰ ভিতৰতে গ্ৰেপ্তাৰ হোৱা অভিযুক্তক স্থানীয় ৰাইজে দৃষ্টান্তমূলক শাস্তি প্ৰদানৰ দাবী উত্থাপন কৰে।
